മൂവാറ്റുപുഴ :  വിശിഷ്ട സേവനത്തിനുള്ള രാഷ്ട്രപതിയുടെ ബഹുമതി നേടിയ ഐ.എ.എസ് ഉദ്യോഗസ്ഥന്റെ  കുടുംബാംഗങ്ങളെ  മൂവാറ്റുപുഴ  ട്രാഫിക് എസ്.ഐ കൈയേറ്റം ചെയ്തതായി പരാതി.  കഴിഞ്ഞദിവസം പ്രൈവറ്റ് സ്റ്റാന്റിന്  സമീപത്തുള്ള ബേക്കറിയില്‍ നിന്ന് ഭക്ഷണസാധനങ്ങള്‍  വാങ്ങാന്‍ എത്തിയ  കുടുംബത്തിനാണ്  ട്രാഫിക് എസ്.ഐയുടെ മര്‍ദനമേല്‍ക്കേണ്ടി വന്നത്.  സംഭവത്തില്‍ പരിക്കേറ്റ കിഴക്കേക്കര  മാളിയേക്കല്‍ അഹദിനെ മൂവാറ്റുപുഴ ജനറല്‍ ആശുപത്രിയില്‍ അഡ്മിറ്റ് ചെയ്തു.  അഹദും, മാതാവും സഹോദരനും സഞ്ചരിച്ചിരുന്ന വാഹനം നോ പാര്‍ക്കിങില്‍ നിര്‍ത്തിയെന്നാരോപിച്ച്  ട്രാഫിക് എസ്.ഐ സുനില്‍ തോമസ് മോശമായി പെരുമാറുകയും  അസഭ്യം പറയുകയും  ചെയ്തു. തുടര്‍ന്ന് കൈ പിടിച്ച്  ബലമായി തിരിച്ച് സ്റ്റേഷനിലേക്ക് കൊണ്ടുപോയതായും  ചെയ്യാത്ത കുറ്റത്തിന്  കേസ് ചാര്‍ജ് ചെയ്തതായും  അഹദ് പൊലിസിന് മൊഴി നല്‍കി.
 ബേക്കറി കടയ്ക്ക് മുന്നില്‍  നോ പാര്‍ക്കിങ് മേഖലയല്ലെന്നും  ഇരുചക്രവാഹനങ്ങളും  ഓട്ടോറിക്ഷകളും അടക്കമുള്ളവ  പാര്‍ക്ക് ചെയ്തിരുന്നിടത്താണ് താനും വാഹനം നിര്‍ത്തിയിരുന്നതെന്നുംഅഹദ് പറഞ്ഞു. അമ്മ അടക്കമുള്ള കുടുംബാംഗങ്ങള്‍  ഉള്ളതിനാലും നോമ്പ് സമയമായതിനാലും സ്റ്റേഷനില്‍ കൊണ്ടുപോകരുതെന്നും  പെനാല്‍റ്റി അടച്ചുകൊള്ളാമെന്നും  പറഞ്ഞിട്ടും എസ്.ഐ വനിതകള്‍ അടക്കമുള്ളവരെ സ്റ്റേഷനിലേക്ക് കൊണ്ട് പോയതായി അദ്ദേഹം പറഞ്ഞു. എസ്.ഐക്കെതിരെ നടപടി  ആവശ്യപ്പെട്ട്  ഉന്നത അധികാരികള്‍ക്ക്  പരാതി നല്‍കുവാന്‍ ഒരുങ്ങുകയാണ്  അഹദിന്റെ കുടുംബം.