വടകര: മേളയുടെ ആദ്യദിനം സമാധാനപരമായി അവസാനിച്ചെങ്കിലും രണ്ടാംദിനം വിധികര്‍ത്താക്കള്‍ക്കു നേരെയുള്ള പ്രതിഷേധങ്ങള്‍. താഴങ്ങാടിയിലെ എം.യു.എം സ്‌കൂളിലെ വേദി അഞ്ചില്‍ നടന്ന ഹൈസ്‌കൂള്‍ വിഭാഗം പൂരക്കളി മത്സരത്തിലെ വിധിനിര്‍ണയത്തെ ചൊല്ലിയായിരുന്നു തര്‍ക്കം. ആകെ അഞ്ചു ടീമുകള്‍ മാത്രം പങ്കെടുത്ത മത്സരത്തില്‍ ഫലം പ്രഖ്യാപിച്ചയുടനെയാണു വിധികര്‍ത്താക്കളെ തടഞ്ഞുവച്ചത്.
മേമുണ്ട ഹയര്‍ സെക്കന്‍ഡറി സ്‌കൂള്‍ ടീമിനായിരുന്നു ഒന്നാം സ്ഥാനം ലഭിച്ചത്. വിധിനിര്‍ണയം ശരിയല്ലെന്ന് ആരോപിച്ച് കോഴിക്കോട് സെന്റ് ജോസഫ് ബോയ്‌സ് ഹയര്‍ സെക്കന്‍ഡറി സ്‌കൂളിലെ മത്സരാര്‍ഥികളും അധ്യാപകരുമാണ് ബഹളം വച്ചത്. സ്റ്റേജിന്റെ പിന്‍വശത്തുനിന്ന് പരിശീലകന്‍ വിധികര്‍ത്താക്കളെ ആംഗ്യഭാഷയിലൂടെ സ്വീധിനിച്ചെന്നാണ് ഇവരുടെ ആരോപണം. തര്‍ക്കം രൂക്ഷമായതോടെ പൊലിസ് സ്ഥലത്തെത്തി വിധികര്‍ത്താക്കളെ സുരക്ഷിത സ്ഥലത്തെത്തിച്ചു. അതേസമയം മികച്ച രീതിയില്‍ കളിച്ചവര്‍ക്കു തന്നെയാണ് ഒന്നാം സ്ഥാനം നല്‍കിയതെന്ന് വിധികര്‍ത്താക്കളില്‍ ഒരാള്‍ പറഞ്ഞു.
പ്രധാനവേദിയായ സെന്റ് ആന്റണീസ് ഹൈസ്‌കൂളിലെ വേദി രണ്ടില്‍ നടന്ന നാടോടിനൃത്തത്തിലും പ്രതിഷേധമുയര്‍ന്നു. ഹൈസ്‌കൂള്‍ വിഭാഗം നാടോടി നൃത്തം കഴിഞ്ഞപ്പോള്‍ ഫോക്‌ലോര്‍ കലാരൂപങ്ങള്‍ മാത്രമാണു നാടോടി നൃത്തത്തില്‍ അവതരിപ്പിക്കാന്‍ പാടുള്ളൂവെന്ന് കലോത്സവ മാന്വലില്‍ ഉണ്ടെന്നും അതുപ്രകാരം അവതരിപ്പിക്കപ്പെട്ടത് മൂന്നു നൃത്തങ്ങള്‍ മാത്രമാണെന്നും ഇതില്‍നിന്ന് വിജയിയെ തിരഞ്ഞെടുത്തതാണെന്നും വിധികര്‍ത്താക്കള്‍ പറഞ്ഞു. ഇതിനെ ചോദ്യംചെയ്ത് ഒരുവിഭാഗം രക്ഷിതാക്കള്‍ എത്തിയതാണ് കശപിശക്ക് കാരണമായത്. പൊലിസ് സ്ഥലത്തെത്തി രക്ഷിതാക്കളെ അനുനയിപ്പിക്കുകയായിരുന്നു.
വേദി നാലില്‍ 3.30നു തുടങ്ങേണ്ട ഹൈസ്‌കൂള്‍ വിഭാഗം അറബനമുട്ടും വിധികര്‍ത്താക്കളെ ചൊല്ലി ഏറെ നേരം തടസപ്പെട്ടു. മത്സരത്തില്‍ പങ്കെടുക്കുന്ന ടീമുകളുടെ പരിശീലകര്‍ വിധികര്‍ത്താക്കളില്‍ ഉണ്ടെന്നായിരുന്നു പരാതി. ബഹളം വച്ചവരെ പൊലിസെത്തി നീക്കം ചെയ്തു. അതേസമയം ഡി.പി.ഐയുടെ ജഡ്ജിങ് പാനലിലുള്ളവരെയാണ് വിധികര്‍ത്താക്കളായി തിരഞ്ഞെടുത്തതെന്ന് ഡി.ഡി.ഇ ഇ.കെ സുരേഷ്‌കുമാര്‍ പറഞ്ഞു.