തെഹ്‌റാന്‍: ആണവ പരീക്ഷണവുമായി ബന്ധപ്പെട്ട് അമേരിക്കയുടെ ആരോപണങ്ങളെ ശക്തമായി തള്ളി ഇറാന്‍. അമേരിക്ക തങ്ങളുടെ സ്വഭാവം പോലെ തന്നെ അടിസ്ഥാനരഹിതമായ ആരോപണങ്ങളാണ് ഇറാനെതിരേ ഉന്നയിച്ചിരിക്കുന്നതെന്നും ഇതിനെ ശക്തമായി തള്ളിക്കളയുന്നുവെന്നും ഇറാന്‍ വിദേശകാര്യ മന്ത്രാലയം വാര്‍ത്താകുറിപ്പില്‍ അറിയിച്ചു.
ഇത്തരം തെറ്റായതും അവാസ്തവപരവുമായ ആരോപണങ്ങള്‍ ഉന്നയിക്കുന്നത് ഇറാനോടുള്ള ശത്രുത കൊണ്ടു മാത്രമാണ്. ആണവ വിഷയത്തില്‍ രാജ്യാന്തര സമൂഹത്തോടുള്ള ഉത്തരവാദിത്തം നിറവേറ്റാന്‍ കഴിയാത്തതില്‍നിന്നു ശ്രദ്ധ തിരിച്ചുവിടാനാണ് അവരുടെ നീക്കം. സയണിസ്റ്റ് ഭരണകൂടത്തിനും ഭീകരവാദ സംഘങ്ങള്‍ക്കും അമേരിക്ക പിന്തുണ തുടരുന്നതിന്റെ ഭാഗമാണിതെന്നും മന്ത്രാലയം വാര്‍ത്താകുറിപ്പില്‍ കുറ്റപ്പെടുത്തി.