പുലാമന്തോള്‍: വംശനാശഭീഷണി നേരിട്ടു കൊണ്ടിരിക്കുന്ന ദശപുഷ്പങ്ങളില്‍ പ്രധാനിയായ തുമ്പപ്പൂച്ചെടി കൃഷിയെ പരിപോഷിപ്പിക്കുക എന്ന ലക്ഷ്യത്തോടെ പുലാമന്തോള്‍ ഗവ. ഹയര്‍ സെക്കന്‍ഡറി സ്‌കൂളിലെ വിദ്യാര്‍ഥികള്‍ക്ക് തുമ്പപ്പൂ തൈകള്‍ വിതരണം നടത്തി.
കര നെല്‍കൃഷിയിലൂടെ പ്രസിദ്ധനും നിരവധി കര്‍ഷക പുരസ്‌ക്കാരങ്ങളും ഏറ്റുവാങ്ങിയ പുലാമന്തോളിലെ ജൈവ കര്‍ഷകന്‍ ചോലപ്പറമ്പത്ത് ശശിധരന്റെ മകനും കുട്ടി കര്‍ഷകനുമായ അഭിലാല്‍ തന്റെ സ്വന്തം വിദ്യാലയത്തിലെ വിദ്യാര്‍ഥികള്‍ക്കായി പ്രത്യേകം മുളപ്പിച്ചെടുത്ത് തയാറാക്കിയ ആയിരത്തോളം തുമ്പപ്പൂ തൈകളാണ് വിതരണം ചെയ്തത്.
പുലാമന്തോള്‍ കൃഷി ഓഫിസര്‍ ഉണ്ണികൃഷ്ണന്‍ വിതരണോദ്ഘാടനം നിര്‍വഹിച്ചു. തുമ്പപ്പൂ ചെടി നട്ടുവളര്‍ത്താനുള്ള ബോധവല്‍ക്കരണവും അദ്ദേഹം നിര്‍വഹിച്ചു.
ഡെപ്യൂട്ടി ഹെഡ്മാസ്റ്റര്‍ വീരാന്‍, സീനത്ത് ടീച്ചര്‍, നാരായണന്‍ മാസ്റ്റര്‍, അനില്‍ മാസ്റ്റര്‍, പ്രവീണ്‍ മാസ്റ്റര്‍, ജാളി ടീച്ചര്‍, ഇക്ബാല്‍ പുലാമന്തോള്‍ സംബന്ധിച്ചു.