കോഴിക്കോട്: സന്തോഷ് ട്രോഫി ദക്ഷിണ മേഖലാ യോഗ്യതാ മത്സരത്തില്‍ തമിഴ്‌നാടിന് ജയം. ആദ്യ മത്സരത്തില്‍ കേരളത്തിനോട് 5-0ന് പരാജയപ്പെട്ട ആന്ധ്രാ പ്രദേശിനെ 4-1നാണ് തമിഴ്‌നാട് പരാജയപ്പെടുത്തിയത്. ഇതോടെ രണ്ട് മത്സരങ്ങളില്‍ പരാജയപ്പെട്ട ആന്ധ്രാ പ്രദേശ് ഫൈനല്‍ റൗണ്ട് കാണാതെ പുറത്തായി. കന്യാകുമാരിക്കാരന്‍ എല്‍. ലിജോയുടെ ഹാട്രിക്കിന്റെ കരുത്തിലാണ് തമിഴ്‌നാടിന്റെ ജയം. കളിയുടെ 16ാം മിനുട്ടില്‍ എ. ദിവാകറാണ് തമിഴ്‌നാടിനായി വലകുലുക്കിയത്. കളിയുടെ 22, 72, 86 മിനിട്ടുകളില്‍ ഗോള്‍ നേടി ലിജോ ഹാട്രിക് തികച്ചതോടെ ടീം 4-1 ന് ജയം സ്വന്തമാക്കി.