ശരീഫ് കൂലേരി#

തൃക്കരിപ്പൂര്‍: വിദേശത്ത് നിരോധനമുള്ള മുഖ സൗന്ദര്യം വര്‍ധിപ്പിക്കാനുള്ള ക്രീം സംസ്ഥാനത്ത് സുലഭം. ഏതു നിറത്തിലുള്ളവരെയും വെളിപ്പിച്ചെടുക്കാമെന്ന പരസ്യമാണ് യുവാക്കളെയും യുവതികളെയും ക്രീമിലേക്ക് ആകര്‍ഷിക്കുന്നത്. പാകിസ്താനില്‍ നിര്‍മിച്ച ഫായിസ ക്രീമാണ് സംസ്ഥാനത്തെ വിവിധ മാര്‍ക്കറ്റുകളില്‍ സുലഭമായി വിറ്റഴിക്കുന്നത്.
ക്രീം ഉപയോഗിച്ചാല്‍ പാര്‍ശ്വഫലങ്ങളുണ്ടാകുമെന്ന കണ്ടെത്തലിനെത്തുടര്‍ന്ന് അറബ് രാജ്യമായ യു.എ.ഇ ഇത് നിരോധിച്ചിട്ടുണ്ട്. 250 മുതല്‍ 450 രൂപവരെ ഈടാക്കുന്ന ക്രീം മംഗളൂരു വഴി തിരൂരിലെ മൊത്ത വിതരണക്കാരിലെത്തിച്ച് അവിടെ നിന്നാണ് ചെറുകിട വില്‍പനക്കാരിലെത്തുന്നത്.
വിദേശ നിര്‍മിത ഉല്‍പന്നങ്ങള്‍ വില്‍പന നടത്തുന്ന ചില ഗള്‍ഫ് ബസാറുകള്‍ വഴിയാണ് ക്രീമുകള്‍ ഉപഭോക്താക്കളിലെത്തുന്നത്. സംസ്ഥാനത്തെ യുവജനങ്ങളില്‍ ക്രീം തരംഗമായെങ്കിലും ഇത് പരിശോധിക്കാനോ നടപടിയെടുക്കാനോ അധികൃതര്‍ തയാറായിട്ടില്ല.