കൊച്ചി: വടകര കോട്ടക്കലിലുള്ള കുഞ്ഞാലിമരക്കാര്‍ മ്യൂസിയത്തില്‍ നിന്നു ചരിത്രപ്രാധാന്യമുള്ള രണ്ടു പീരങ്കികള്‍ മാറ്റുന്നതു സംബന്ധിച്ച വിഷയത്തില്‍ രണ്ടാഴ്ചത്തേക്കു കൂടി തല്‍സ്ഥിതി തുടരുന്നതിനു ഹൈക്കോടതി നിര്‍ദ്ദേശം. വടകര സ്വദേശി പി.എന്‍ അനില്‍കുമാര്‍ നല്‍കിയ ഹരജിയിലാണ് ഹൈക്കോടതിയുടെ ഇടക്കാല ഉത്തരവുണ്ടായത്. മ്യൂസിയത്തില്‍ നിന്നു പീരങ്കികള്‍ തലശേരിയിലുള്ള കണ്ണൂര്‍ ജില്ലാ ടൂറിസം പ്രമോഷന്‍ കൗണ്‍സില്‍ ഓഫിസിലേക്ക് കൊണ്ടുപോകാനുള്ള ടൂറിസം വകുപ്പിന്റെ നടപടിയിലാണ് തല്‍സ്ഥിതി തുടരാന്‍ ജസ്റ്റിസ് പി.ബി സുരേഷ് കുമാര്‍ നിര്‍ദേശിച്ചത്.
നിയമപ്രകാരം എല്ലാ പീരങ്കികളും കുഞ്ഞാലിമരക്കാര്‍ മ്യൂസിയത്തില്‍ തന്നെ സൂക്ഷിക്കേണ്ടതുണ്ടെന്നാണ് ഹരജിക്കാരുടെ വാദം. പീരങ്കികള്‍ മാറ്റുന്നത് ഭാവി തലമുറയ്ക്കു ചരിത്രപഠനത്തിനു വിഘാതമാവുമെന്നും ഹരജിക്കാര്‍ വാദിക്കുന്നു. മ്യൂസിയത്തില്‍ നിന്ന് പീരങ്കികള്‍ മാറ്റാനുള്ള സര്‍ക്കാര്‍ ഉത്തരവ് റദ്ദാക്കണമെന്നാണു ഹരജിക്കാരുടെ ആവശ്യം.