ന്യൂഡല്‍ഹി: ഗാന്ധി കുടുംബത്തിലെ മൂന്ന് നേതാക്കള്‍ക്ക് നല്‍കിയിരുന്ന എസ്.പി.ജി സുരക്ഷ പിന്‍വലിച്ച നടപടിയെ ചൊല്ലി കൊണ്‍ഗ്രസും ബി.ജെ.പിയും തമ്മിലുള്ള തര്‍ക്കം രൂക്ഷം. എസ്.പി.ജി സുരക്ഷ പിന്‍വലിച്ചതിനു പിന്നില്‍ രാഷ്ട്രീയം മാത്രമാണെന്നും ഇത് സംഭവക്കുമെന്ന് പ്രതീക്ഷിച്ചതായിരുന്നുവെന്നും കോണ്‍ഗ്രസ് ജന. സെക്രട്ടറി പ്രിയങ്കാ ഗാന്ധി ആരോപിച്ചു.
ഈ മാസം ആദ്യത്തിലാണ് സോണിയാ ഗാന്ധി, രാഹുല്‍ ഗാന്ധി, പ്രിയങ്കാ ഗാന്ധി എന്നിവര്‍ക്ക് ഏര്‍പ്പെടുത്തിയിരുന്ന എസ്.പി.ജി സുരക്ഷ കേന്ദ്ര സര്‍ക്കാര്‍ പിന്‍വലിച്ചത്. മൂന്നുപേര്‍ക്കും ഇസെഡ് പ്ലസ് സുരക്ഷയായിരുന്നു നല്‍കിയിരുന്നത്. പകരം സി.ആര്‍.പി.എഫിനെയാണ് സുരക്ഷക്കായി നിയോഗിച്ചത്.

എസ്.പി.ജി സുരക്ഷ പിന്‍വലിച്ചതിനെ ചൊല്ലി പാര്‍ലമെന്റിനകത്തും പുറത്തും കോണ്‍ഗ്രസ് പ്രതിഷേധിക്കുന്നതിനിടയില്‍ ഇതാദ്യമായാണ് ഗാന്ധി കുടുംബത്തില്‍ നിന്നുള്ള ഒരംഗം ബി.ജെ.പിക്കെതിരേ പ്രത്യക്ഷ വിമര്‍ശനവുമായി രംഗത്തെത്തിയത്.
രാജ്യത്തിന്റെ സാമ്പത്തിക സ്ഥിതി മോശമെന്ന് ചൂണ്ടിക്കാണിച്ചതിനുള്ള പ്രതികാരമായാണ് എസ്.പി.ജി സുരക്ഷ പിന്‍വലിക്കുന്നതിനുള്ള കാരണമെന്നും പ്രിയങ്ക ആരോപിച്ചു.