തൃശൂര്‍: കരുണയാണ് തിരുനബി എന്ന പ്രമേയത്തില്‍ എസ്.കെ.എസ്.എസ്.എഫ്  റബീഅ് കാംപയിനിന്റെ ഭാഗമായുള്ള മദീന പാഷന്‍ ഇന്ന് ഉച്ചയ്ക്ക് രണ്ട് മുതല്‍ രാത്രി 10 വരെ തൃശൂര്‍ ജില്ലയിലെ കുന്നംകുളം വെള്ളറക്കാട് ഖദീജ ബിന്‍ത് ബുഖാരി വഫിയ കാംപസില്‍ നടക്കും.

 വിവിധ ഭാഗങ്ങളില്‍നിന്ന് എത്തുന്ന രണ്ടായിരത്തിലധികം വരുന്ന പ്രവാചക സ്‌നേഹികള്‍ക്കായി വിപുലമായ സൗകര്യങ്ങളാണ് ഒരുക്കിയിരിക്കുന്നത്.

പാണക്കാട് സയ്യിദ് സാദിഖലി ശിഹാബ് തങ്ങള്‍ ഉദ്ഘാടനം നിര്‍വഹിക്കും. 

എസ്.കെ.എസ്.എസ്.എഫ് സംസ്ഥാന പ്രസിഡന്റ് സയ്യിദ് ഹമീദലി ശിഹാബ് തങ്ങള്‍ അധ്യക്ഷനാകും. സമസ്ത ജന.സെക്രട്ടറി കെ. ആലിക്കുട്ടി മുസ്‌ലിയാര്‍ ആത്മീയ സംഗമത്തിന് നേതൃത്വം നല്‍കും. 

സമസ്ത കേന്ദ്ര മുശാവറ അംഗം എന്‍.കെ അബ്ദുല്‍ഖാദിര്‍ മുസ്‌ലിയാര്‍ പ്രാര്‍ഥന നിര്‍വഹിക്കും. അബ്ദുസ്സലാം ബാഖവി ദുബൈ, റഹ്മത്തുല്ലാഹ് ഖാസിമി മൂത്തേടം,അബ്ദുസ്സലാം ഫൈസി ഒളവട്ടൂര്‍, ഓണംപിള്ളി മുഹമ്മദ് ഫൈസി, സ്വാലിഹ് അന്‍വരി ചേകനൂര്‍, ബഷീര്‍ ഫൈസി ദേശമംഗലം വിവിധ വിഷയങ്ങളവതരിപ്പിക്കും. മൗലിദ്, ബുര്‍ദ, സ്വലാത്ത്, മദ്ഹുനബി ഗാനാലാപനം ഇശ്ഖ് മജ്‌ലിസ് തുടങ്ങിയ പരിപാടികളും മദീന പാഷനില്‍ അരങ്ങേറും.