കോഴിക്കോട്: ശബരിമല വിഷയത്തില്‍ മുഖ്യമന്ത്രിയെയും മന്ത്രിമാരെയും വഴിയില്‍ തടയുമെന്ന് ബി.ജെ.പി സംസ്ഥാന ജന. സെക്രട്ടറി എം.ടി രമേശ്. മുഖ്യമന്ത്രിയും മന്ത്രിമാരും പങ്കെടുക്കുന്ന പൊതുപരിപാടികളില്‍ പ്രതിഷേധം സംഘടിപ്പിക്കും. നിയമപരമായി സര്‍ക്കാരിനെക്കൊണ്ട് കണക്കുപറയിക്കും. കെ.പി ശശികല, കെ. സുരേന്ദ്രന്‍ എന്നിവരെ അറസ്റ്റ് ചെയ്ത യതീഷ് ചന്ദ്രക്കെതിരേ നിയമനടപടി സ്വീകരിക്കുന്നതിന്റെ ഭാഗമായി നോട്ടിസ് അയച്ചിട്ടുണ്ട്.
സര്‍ക്കാര്‍ സമര്‍പ്പിച്ച സത്യവാങ്മൂലത്തില്‍ വിശ്വാസമില്ലെന്നാണ് ഹൈക്കോടതി പറയാതെ പറഞ്ഞത്. ഈ വിധി സര്‍ക്കാരിനെതിരേയുള്ള കുറ്റപത്രമാണ്. കരുതല്‍തടങ്കല്‍ പ്രകാരം കസ്റ്റഡിയിലെടുത്ത കെ. സുരേന്ദ്രന്‍ പുറത്തിറങ്ങരുതെന്ന് നിര്‍ബന്ധമുള്ളവരാണ് അദ്ദേഹത്തെ പീഡിപ്പിക്കുന്നത്. സുരേന്ദ്രന്റെ പേരില്‍ എടുത്തതെല്ലാം കള്ളക്കേസുകളാണ്. കേസില്‍ നിലനില്‍ക്കാത്ത വകുപ്പുകള്‍ ചേര്‍ക്കുകയാണ്. മജിസ്‌ട്രേറ്റിന് ജാമ്യംനല്‍കാവുന്ന കേസായിട്ടും അനന്തമായി നീട്ടിക്കൊണ്ടുപോകുന്നു. ചിത്തിര ആട്ടവിശേഷ നാളില്‍ എടുത്ത കേസ് നൂറു ശതമാനവും കെട്ടിച്ചമച്ചതാണ്. കേരളത്തില്‍ നിലനില്‍ക്കുന്നത് ഭരണകൂട ഭീകരതയാണ്. അത് അടിയന്തരാവസ്ഥയേക്കാള്‍ ഭീകരമാണെന്നും ഇതിനെതിരേ ഏതറ്റംവരെയും ബി.ജെ.പി പോരാടുമെന്നും അദ്ദേഹം വാര്‍ത്താസമ്മേളനത്തില്‍ പറഞ്ഞു.