അടിമാലി (ഇടുക്കി):ബൈക്കും കാറും കൂട്ടിയിടിച്ച് കോളജ് വിദ്യാര്‍ഥി മരിച്ചു. സഹയാത്രികന്് ഗുരുതര പരിക്ക്. രാജകുമാരി എന്‍.എസ്.എസ് കോളജ് ഒന്നാം വര്‍ഷ ബി.എസ്.സി ഇലക്ട്രോണിക്‌സ് വിദ്യാര്‍ഥി രാജകുമാരി ചൂടമ്മാനായില്‍ ജോജിന്‍ ഫ്രാന്‍സിസ്(19) ആണ് മരിച്ചത്. ആവണക്കുംചാല്‍ വട്ടുകുന്നേല്‍ നിതിന്‍ ജോസഫ് (21)നെ സാരമായ പരുക്കുകളോടെ എറണാകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചു. നിതിനാണ് ബൈക്ക് ഓടിച്ചിരുന്നത്. ഇടിയുടെ ആഘാതത്തില്‍ ബൈക്കിന് തീപിടിച്ച് കത്തി നശിച്ചു.

ഇന്നലെ വൈകിട്ട് 4.35ന് രാജകുമാരി എന്‍.എസ്.എസ് കോളജിന് മുന്നിലായിരുന്നു അപകടം. പരീക്ഷ കഴിഞ്ഞിറങ്ങിയ ജോജിനെ കൂട്ടിക്കൊണ്ട് പോകാനായി കടയില്‍ ജോലി ചെയ്യുന്ന നിതിന്‍ എത്തിയതായിരുന്നു. കോളജ് കോമ്പൗണ്ടില്‍ നിന്നും ഇരുവരും ബൈക്കില്‍ മെയിന്‍ റോഡിലേയ്ക്ക് ഇറങ്ങുന്നതിനിടെ നിയന്ത്രണം വിട്ട് കാറില്‍ അമിത വേഗതയില്‍ ചെന്ന് ഇടിക്കുകയായിരുന്നു. പിന്‍സീറ്റില്‍ ഹെല്‍മെറ്റ് ധരിക്കാതെ ഇരുന്ന ജോജിന്റെ തല കാറിന്റെ ഗ്ലാസില്‍ ഇടിച്ചതിനെത്തുടര്‍ന്ന് സാരമായി പരുക്കേറ്റു. ഇരുവരെയും എറണാകുളത്തെ ആശുപത്രിയിലേക്ക് കൊണ്ടുപോകും വഴി വാളറയില്‍ ജോജിന്‍ മരിച്ചു. നിതിന്റെ ശരീരത്തില്‍ പലയിടത്തും കാര്യമായ മുറിവുകളുണ്ട്.