വടക്കാഞ്ചേരി : മുളങ്കുന്നത്ത് കാവ് മെഡിക്കല്‍ കോളജില്‍ രാഷ്ട്രീയ താല്‍പര്യങ്ങളുടെ അളവുകോലില്‍ കുടുങ്ങി ഭക്ഷണശാലകള്‍ . ഭക്ഷ്യ സുരക്ഷാ വകുപ്പ് അടച്ചു പൂട്ടാന്‍ കര്‍ശന നിര്‍ദ്ദേശം നല്‍കിയ ക്യാന്റീന്‍ യാതൊരു വിഘാതവുമില്ലാതെ ഇന്നലെയും തുറന്നു പ്രവര്‍ത്തിച്ചപ്പോള്‍ മികച്ച ഭക്ഷണം ജനങ്ങള്‍ക്ക് ഉറപ്പു നല്‍കുന്ന ഇന്ത്യന്‍ കോഫീ ഹൗസിന് ഇന്നലെ വൈകീട്ടു താഴു വീണു. സ്വകാര്യ വ്യക്തി കരാറെടുത്ത ക്യാന്റീനു ലൈസന്‍സ് ഇല്ലാത്തതിനാലും ഭക്ഷണത്തിനു കൃത്രിമ നിറം നല്‍കുന്ന പദാര്‍ത്ഥം പിടിച്ചെടുത്തതിനാലുമാണ് കഴിഞ്ഞ ദിവസം ഭക്ഷ്യ സുരക്ഷാ വകുപ്പ് ക്യാന്റീന്‍ അടച്ചു പൂട്ടാന്‍ നിര്‍ദ്ദേശം നല്‍കിയത്. മിന്നല്‍ പരിശോധനയില്‍ രണ്ടു മാസമായി ക്യാന്റീന്‍ പ്രവര്‍ത്തിയ്ക്കുന്നത് ലൈസന്‍സ് ഇല്ലാതെയാണെന്നു കണ്ടെത്തിയിട്ടുണ്ട്.
ഇത്രയും ഗുരുതരമായ ക്രമക്കേടുകള്‍ റിപ്പോര്‍ട്ടു ചെയ്തിട്ടും ക്യാന്റീന്‍ തുറന്നു പ്രവര്‍ത്തിപ്പിയ്ക്കാന്‍ അനുമതി നല്‍കിയ മെഡിക്കല്‍ കോളജ് അധികൃതരുടെ നിലപാട് വന്‍ പ്രതിഷേധം ക്ഷണിച്ചു വരുത്തി കഴിഞ്ഞു. സ്വകാര്യ കരാറുകാരനെ സംരക്ഷിയ്ക്കാന്‍ കഴിഞ്ഞ 18 വര്‍ഷമായി മെഡിയ്ക്കല്‍ കോളജില്‍ പ്രവര്‍ത്തിച്ചു വരുന്ന ഇന്ത്യന്‍ കോഫി ഹൗസിന്റെ കരാര്‍ പുതുക്കി നല്‍കാത്തതിനെതിരേയും പ്രതിഷേധം ഉയരുകയാണ്. മെഡിയ്ക്കല്‍ കോളജ് അധികൃതരുടെ അഭ്യര്‍ത്ഥന മാനിച്ചാണ് ഇന്ത്യന്‍ കോഫി ഹൗസ് പ്രവര്‍ത്തനമാരംഭിച്ചത്. ഇന്നലെ കരാര്‍ അവസാനിച്ചപ്പോള്‍ അതു പുതുക്കി നല്‍കാതിരിയ്ക്കുകയായിരുന്നു. ഒന്‍പതു വര്‍ഷം മുമ്പ് സര്‍ക്കാര്‍ ഇറക്കിയ ഉത്തരവിന്റെ അടിസ്ഥാനത്തിലാണ് കാന്റീന്‍ പൂട്ടുന്നതെന്നാണു മെഡിക്കല്‍ കോളജ് അധികൃതര്‍ പറയുന്നത് .
സര്‍ക്കാര്‍ ആശുപത്രികളിലെ ക്യാന്റീനുകള്‍ ടെണ്ടര്‍ വിളിയ്ക്കാതെ നല്‍കരുതെന്നാണത്രെ ഉത്തരവില്‍ പറയുന്നത്. ഇന്ത്യന്‍ കോഫീ ഹൗസ് പ്രവര്‍ത്തിയ്ക്കുന്നത് മാസ വാടക അടിസ്ഥാനത്തിലാണ്. കോഫീ ഹൗസിനു നല്‍കിയ കത്തില്‍ കരാര്‍ പുതുക്കാന്‍ നിര്‍വ്വാഹമില്ലെന്നു മാത്രമാണു പരാമര്‍ശം. കോഫീഹൗസ് ശാഖ പൂട്ടിയതോടെ ഇവിടെ ജോലി ചെയ്തിരുന്ന നൂറോളം തൊഴിലാളികളുടെ ഭാവിയും അനിശ്ചിതത്വത്തിലായി. രാഷ്ട്രീയ താല്‍പ്പര്യങ്ങളാണ് കോഫീ ഹൗസിനെ ഇല്ലാതാക്കുന്നതെന്ന ആക്ഷേപവും ശക്തമാണ്. ജീവനക്കാര്‍ക്ക് സബ്‌സിഡി നിരക്കില്‍ ഭക്ഷണവും ജനങ്ങള്‍ക്ക് മികച്ച ഭക്ഷണവും ചൂടുവെള്ളവും ഉറപ്പാക്കിയിരുന്ന കോഫീ ഹൗസ് ഇല്ലാതാകുന്നത് സാധാരണ ജനങ്ങളെ വല്ലാതെ ബാധിയ്ക്കുമെന്നും ഉറപ്പാണ്.