ശ്രീനഗര്‍: ജമ്മു കശ്മിരിലെ പുല്‍വാമയില്‍ സൈന്യവുമായുള്ള ഏറ്റുമുട്ടലില്‍ രണ്ട് തീവ്രവാദികള്‍ കൊല്ലപ്പെട്ടു. പുല്‍വാമയിലെ തഹാബ് മേഖലയില്‍ രഹസ്യവിവരത്തിന്റെ അടിസ്ഥാനത്തില്‍ സൈന്യം നടത്തിയ തിരച്ചിലിനിടയിലാണ് ഏറ്റുമുട്ടല്‍ നടന്നത്.
അതിനിടെ, ഏറ്റുമുട്ടലിനെതിരേ പ്രതിഷേധവുമായി നാട്ടുകാര്‍ രംഗത്തെത്തി. സൈന്യവുമായി നടന്ന സംഘര്‍ഷത്തില്‍ ആറു നാട്ടുകാര്‍ക്ക് പരുക്കേറ്റിട്ടുണ്ട്. പ്രതിഷേധക്കാരെ പിരിച്ചുവിടാന്‍ സൈന്യം ടിയര്‍ ഗ്യാസ് ഷെല്ലുകള്‍ ഉപയോഗിക്കുകയായിരുന്നു. പരുക്കേറ്റ നാട്ടുകാരില്‍ ഒരാളുടെ നില ഗുരുതരമാണ്. ശനിയാഴ്ച രാത്രിയാണ് തീവ്രവാദികളുടെ സാന്നിധ്യത്തെ കുറിച്ച് സൈന്യത്തിനു രഹസ്യ വിവരം ലഭിച്ചത്.
സ്‌പെഷല്‍ ഓപറേഷന്‍ വിഭാഗവും 44 രാഷ്ട്രീയ റൈഫിള്‍സും സംയുക്തമായാണ് മേഖലയില്‍ തിരച്ചില്‍ നടത്തിയത്. ഇതിനിടെ സൈന്യത്തിനു നേരെ തീവ്രവാദികള്‍ വെടിയുതിര്‍ക്കുകയായിരുന്നു. ഏറ്റുമുട്ടല്‍ ഇപ്പോഴും തുടരുകയാണ്.