ചെന്നൈ: കഴിഞ്ഞ 15 മാസത്തിനിടെ എന്‍ഫോഴ്‌സ്‌മെന്റ് ഡയറക്ടറേറ്റ്(ഇ.ഡി) 12,000 കോടിയുടെ സ്വത്തുക്കള്‍ കണ്ടുകെട്ടിയതായി റിപ്പോര്‍ട്ട്. നോട്ടുനിരോധനത്തെ തുടര്‍ന്ന് രാജ്യത്തു വ്യാപകമായി നടന്ന കള്ളപ്പണം വെളുപ്പിക്കലുമായി ബന്ധപ്പെട്ട റെയ്ഡുകളിലാണ് ഇത്രയും തുക കണ്ടെത്തിയത്. 2005-2015 കാലയളവില്‍ രാജ്യത്തു നടന്നതിനെക്കാള്‍ വലിയ കള്ളപ്പണവേട്ടയാണ് വെറും 15 മാസങ്ങള്‍ക്കൊണ്ട് ഇ.ഡി നടത്തിയത്.
കേന്ദ്ര ധനകാര്യ സഹമന്ത്രി സന്തോഷ് കുമാര്‍ ഗംഗ്വാര്‍ ആണ് ഇക്കാര്യം വെളിപ്പെടുത്തിയത്. കഴിഞ്ഞ ഒരു വര്‍ഷം കൊണ്ട് ഇ.ഡി 11,032 കോടിയുടെ അനധികൃത സ്വത്തുക്കളാണ് കണ്ടുകെട്ടിയത്. 2005-2015 കാലയളവില്‍ കണ്ടുകെട്ടി തുക 9,003 കോടിയായിരുന്നു. വിജയ്മല്യയുമായി ബന്ധപ്പെട്ട സാമ്പത്തിക കുറ്റകൃത്യങ്ങളില്‍ നടത്തിയ നടപടികളാണ് ഇത്രയധികം സ്വത്തുക്കള്‍ കണ്ടുകെട്ടാന്‍ ഇടയാക്കിയതെന്നാണ് അറിയുന്നത്. കഴിഞ്ഞ ഒരു വര്‍ഷത്തില്‍ മല്യയുടെ 10,000 കോടിയുടെ സ്വത്തുക്കളാണ് ഇ.ഡി കണ്ടുകെട്ടിയത്.
നോട്ടുനിരോധനത്തിനു പിന്നാലെ രാജ്യത്താകമാനം ആദായ നികുതി വകുപ്പ്, സി.ബി.ഐ എന്നിവരുമായി ചേര്‍ന്ന് വന്‍ കള്ളപ്പണവേട്ടയാണ് എന്‍ഫോഴ്‌സ്‌മെന്റ് ഡയറക്ടറേറ്റ് നടത്തിയത്. സ്വകാര്യ കമ്പനി ഉടമകള്‍, സര്‍ക്കാര്‍ ഉദ്യോഗസ്ഥര്‍ തുടങ്ങി പ്രമുഖര്‍ തന്നെ റെയ്ഡില്‍ കുടുങ്ങിയിരുന്നു.