ഭൂവനേശ്വര്‍: 2023ലെ ഹോക്കി ലോകകപ്പ് ഇന്ത്യയില്‍ നടത്താന്‍ തീരുമാനമായി. ഒഡിഷയിലെ റൂര്‍ക്കേലയിലെ വിവധ വേദികളിലായിരിക്കും മത്സരം സംഘടിപ്പിക്കുക.
വേദിയുടെ പ്രഖ്യാപനം കഴിഞ്ഞ ദിവസം ഭൂവനേശ്വറില്‍ നടന്നു. 2023 ജനുവരി 13 മുതല്‍ 29 വരെ ആയിരിക്കും ചാംപ്യന്‍ഷിപ്പ് നടക്കുക. നിലവിലെ ഇന്ത്യന്‍ ഹോക്കി ടീമിന്റെ ഹോം ഗ്രൗണ്ടാണ് ഭൂവനേശ്വറിലെ കലിംഗ സ്റ്റേഡിയം. കഴിഞ്ഞ വര്‍ഷവും ഒഡിഷയില്‍ ഹോക്കി ലോക ചാംപ്യന്‍ഷിപ്പ് നടന്നിരുന്നു.
അന്ന് ബെല്‍ജിയമായിരുന്നു കിരീടം സ്വന്തമാക്കിയത്. കലിംഗ സ്റ്റേഡിയത്തില്‍ 15,000 കാണികളെ സാക്ഷിയാക്കി ഒഡിഷ മുഖ്യമന്ത്രി നവീന്‍ പട്‌നായിക്കാണ് പ്രഖ്യാപനം നടത്തിയത്. കഴിഞ്ഞ തവണ ഇവിടെ നടന്ന ലോകകപ്പ് നമ്മള്‍ പ്രതീക്ഷിച്ചതിനേക്കാള്‍ ഉഷാറാക്കിയിട്ടുണ്ട്.
ജനസാന്നിധ്യം കൊണ്ടും സംഘാടനം കൊണ്ടും, ഇനി വരാനുള്ള ലോകകപ്പില്‍ നേരത്തേതിനേക്കാള്‍ മികച്ചതാക്കുമെന്ന് പ്രഖ്യാപനത്തനിടെ നവീന്‍ പട്‌നായിക്ക് പറഞ്ഞു. ഇന്ത്യന്‍ ഒളിംപിക്‌സ് അസോസിയേഷന്‍ പ്രസിഡന്റ് നരേന്ദര്‍ ദ്രുവ് ബത്രയും ചടങ്ങില്‍ പങ്കെടുത്തു.