കൊച്ചി: ലണ്ടന്‍ ലോകചാമ്പ്യന്‍ഷിപ്പില്‍ മത്സരിക്കുന്നതില്‍ നിന്ന് മലയാളി താരം പി.യു ചിത്രയെ ഒഴിവാക്കിയതില്‍ പ്രതിഷേധിച്ച് കെ.എസ്.യു പ്രവര്‍ത്തകര്‍ നഗരത്തിലെ പി.ടി ഉഷയുടെ പേരിലുള്ള റോഡ് പുനര്‍നാമകരണം ചെയ്ത് പ്രതിഷേധിച്ചു.
ചിത്രയെ ഒഴിവാക്കാന്‍ പി.ടി ഉഷ ശ്രമിച്ചതിലും ചിത്രയെ അധിക്ഷേപിച്ചതിലും പ്രതിഷേധിച്ചാണ് കെ.എസ്.യു പ്രവര്‍ത്തകര്‍ മഹാരാജാസ് സ്റ്റേഡിയത്തിന് സമീപത്തെ ഉഷയുടെ പേരിലുള്ള റോഡിലെത്തി പ്രതിഷേധിച്ചത്.
മഹാരാജാസ് കെ.എസ്.യു യൂനിറ്റ് കമ്മിറ്റിയുടെ ആഭിമുഖ്യത്തിലാണ് പ്രതിഷേധ പരിപാടി സംഘടിപ്പിച്ചത്. കോളജില്‍ നിന്ന് പ്രകടനമായി എത്തിയ പ്രവര്‍ത്തകര്‍ നഗരസഭ സ്ഥാപിച്ചിരുന്ന പി.ടി ഉഷയുടെ പേരിലുള്ള ബോര്‍ഡ് കറുത്ത ചായം പൂശി മറച്ച ശേഷം പി.യു ചിത്ര റോഡ് എന്ന് പുനര്‍നാമകരണം ചെയ്യുകയായിരുന്നു. കെ.എസ്.യു. സംസ്ഥാന വൈസ് പ്രസിഡന്റ് സ്‌നേഹ ആര്‍.വി പുനര്‍നാമകരണ ചടങ്ങ് ഉദ്ഘാടനം ചെയ്തു.
യൂനിറ്റ് പ്രസിഡന്റ് ജിബിന്‍ ബാബു അധ്യക്ഷനായി. കെ.എസ്.യു മുന്‍ ജില്ല പ്രസിഡന്റ് ടിറ്റോ ആന്റണി, കെ.എസ്.യു നേതാക്കളായ കെ.സേതുരാജ്, വി.ആര്‍ രാംലാല്‍, ഷാരോണ്‍ പനയ്ക്കല്‍, വിവേക് ഹരിദാസ്, അനീഷ് കെ.എച്ച്, ഷാന്‍ പുതുപറമ്പില്‍, നീല്‍ ഹര്‍ഷല്‍, ഷൈന്‍ വിശ്വംഭരന്‍, ആതിര, ശ്രീലക്ഷ്മി, മരിയ, അനന്തു, ആകാശ് അനന്ത്, ഫാബിന്‍ ടാസ്എന്നിവര്‍ നേതൃത്യം നല്‍കി.