തിരുവനന്തപുരം: പകര്‍ച്ചപ്പനി പ്രതിരോധത്തിന് മെഡിക്കല്‍ കോളജ് ആശുപത്രിയിലെ അത്യാഹിത വിഭാഗത്തില്‍ കഫ് കോര്‍ണര്‍ ഉള്‍പ്പെടെ ഫലപ്രദമായ സംവിധാനങ്ങള്‍ ഏര്‍പ്പെടുത്തി.
പനിയും ചുമയുമായി അത്യാഹിത വിഭാഗത്തില്‍ എത്തുന്നവര്‍ക്കെല്ലാം കഫ് കോര്‍ണറില്‍ നിന്ന് മാസ്‌ക് നല്‍കും. കൂട്ടിരിപ്പുകാര്‍ക്കും മാസ്‌ക് ലഭിക്കും. കൂടാതെ പനി പടരാതിരിക്കാന്‍ വേണ്ട മാര്‍ഗനിര്‍ദേശങ്ങളും ചികിത്സയ്‌ക്കൊപ്പം രോഗികള്‍ക്കും കൂട്ടിരിപ്പുകാര്‍ക്കും നല്‍കാന്‍ തീരുമാനിച്ചു. എച്ച്.വണ്‍.എന്‍.വണ്‍ രോഗലക്ഷണവുമായി ആശുപത്രിയില്‍ എത്തുന്നവരില്‍ ഭൂരിഭാഗവും സ്വകാര്യ ആശുപത്രികളിലും മറ്റും ചികിത്സ തേടിയ ശേഷം വരുന്നവരാണെന്ന് മെഡിക്കല്‍ കോളജ് പ്രിന്‍സിപ്പല്‍ ഡോ. തോമസ് മാത്യുവിന്റെ അധ്യക്ഷതയില്‍ ചൊവ്വാഴ്ച ചേര്‍ന്ന വകുപ്പു മേധാവികളുടെ അവലോകന യോഗത്തില്‍ ചര്‍ച്ച ചെയ്യപ്പെട്ടു. പകര്‍ച്ചപ്പനി പടര്‍ന്നു പിടിക്കാതിരിക്കാന്‍ വേണ്ട മുന്‍കരുതല്‍ എന്ന നിലയിലാണ് ആരോഗ്യവകുപ്പ് മന്ത്രി കെ.കെ ശൈലജ ടീച്ചറുടെ നിര്‍ദേശാനുസരണം ആശുപത്രിയില്‍ കഫ് കോര്‍ണര്‍ അടക്കമുള്ള സംവിധാനങ്ങള്‍ ഏര്‍പ്പെടുത്തിയത്.
കൂടാതെ രോഗികള്‍ക്കും കൂട്ടിരിപ്പുകാര്‍ക്കും വേണ്ട മുന്‍കരുതലുകളെക്കുറിച്ച് ബോധവല്‍കരണവും ഇവിടെ നിന്ന് ലഭിക്കും. പനിയും ചുമയുമുള്ളവര്‍ നിര്‍ബന്ധമായും കഫ് കോര്‍ണറുകളില്‍ നിന്ന് ലഭിക്കുന്ന മാസ്‌ക് ധരിക്കണം. മാസ്‌ക് ധരിക്കാന്‍ താല്‍പര്യമില്ലാത്തവര്‍ ചുമയ്ക്കുമ്പോള്‍ തുണി ഉപയോഗിച്ച് വാ മൂടണം. കൈകള്‍ സോപ്പും വെള്ളവും ഉപയോഗിച്ച് വൃത്തിയായി കഴുകണമെന്നും അധികൃതര്‍ അറിയിച്ചു.
എച്ച്.വണ്‍ .എന്‍.വണ്‍ രോഗലക്ഷണവുമായി വരുന്നവര്‍ക്ക് ആവശ്യം വേണ്ട മരുന്നുകള്‍ മെഡിക്കല്‍ കോളജ് ആശുപത്രിയില്‍ സ്റ്റോക്ക് ചെയ്തിട്ടുണ്ട് . കൂടാതെ രോഗികള്‍ക്ക് പ്രത്യേകം ഐസൊലേഷന്‍ വാര്‍ഡും പ്രത്യേകം തീവ്രപരിചരണവിഭാഗവും ആശുപത്രിയില്‍ സജ്ജീകരിച്ചിട്ടുണ്ട്.