ശാസ്താംകോട്ട: റോഡരികില്‍ പതുങ്ങി നിന്ന അജ്ഞാതന്‍ നടത്തിയ അക്രമത്തില്‍ പെണ്‍കുട്ടിയ്ക്ക് പരുക്കേറ്റു. വേങ്ങ കുറ്റിയില്‍ മുക്ക് സ്വദേശിനിയായ പെണ്‍കുട്ടിക്കാണ് പരിക്കേറ്റത്.
കഴിഞ്ഞ ദിവസം രാത്രി ഏഴരയോടെ കുറ്റിയില്‍ മുക്ക് മൂത്തോട്ടില്‍ മുക്ക് റെയില്‍വേ സ്റ്റേഷന്‍ റോഡിലാണ് സംഭവം. കായംകുളത്തുനിന്നും കോളജ് വിദ്യാര്‍ഥിനിയായ പെണ്‍കുട്ടി ക്ലാസ് കഴിഞ്ഞ് വീട്ടിലേക്ക് വരുമ്പോഴായിരുന്നു അക്രമം. റോഡില്‍ ആളൊഴിഞ്ഞ ഭാഗത്ത് നിന്ന അജ്ഞാതനെ ശ്രദ്ധിക്കാതെ മുന്നോട്ട് പോയ പെണ്‍കുട്ടിയെ ഇയാള്‍ പിന്തുടര്‍ന്ന് വന്ന് തലയ്ക്ക് കുത്തിപ്പിടിക്കുകയും മൂര്‍ച്ചയുള്ള ആയുധം വച്ച് ശരീരത്തില്‍ നിരവധിമുറിവുകള്‍ ഉണ്ടാക്കുകയുമായിരുന്നു.
തുടര്‍ന്ന് പെണ്‍കുട്ടി കുതറി ഓടി സമീപത്ത് തന്നെയുള്ള സ്വന്തം വീട്ടിലെത്തുകയായിരുന്നു. ബന്ധുക്കള്‍ സംഭവസ്ഥലത്ത് എത്തി അന്വഷിച്ചങ്കിലും അക്രമി ഇതിനോടകം ബൈക്കില്‍ രക്ഷപ്പെട്ടിരുന്നു. പരുക്കേറ്റ പെണ്‍കുട്ടിയെ ശാസ്താംകോട്ട താലൂക്ക് ആശുപത്രിയില്‍ എത്തിച്ച് ചികിത്സ നല്‍കി. ശാസ്താംകോട്ട പൊലിസ് കേസെടുത്തു.