ന്യൂഡല്‍ഹി: മഹാസഖ്യം പിളര്‍ത്തി ബിഹാറില്‍ ബി.ജെ.പിയുമായി കൂട്ടുചേര്‍ന്ന് വീണ്ടും ഭരണത്തിലേറിയ ജെ.ഡി.യു നേതാവും മുഖ്യമന്ത്രിയുമായ നിതീഷ്‌കുമാറിന്റെ നടപടി പാര്‍ട്ടിയെ പിളര്‍പ്പിലേക്കുനയിക്കുമെന്ന് ഉറപ്പായി. മുതിര്‍ന്ന നേതാവ് ശരത് യാദവ് ജെ.ഡി.യുവിലെ ബി.ജെ.പി വിരുദ്ധരെ കൂട്ടുപിടിച്ച് പുതിയ പാര്‍ട്ടി രൂപീകരിച്ചേക്കുമെന്നാണ് വിവരം. ബി.ജെ.പിയോട് അടുക്കാനുള്ള തീരുമാനം നിതീഷ് തങ്ങളോട് കൂടിയാലോചിക്കാതെ എടുത്തതാണെന്ന് ശരത് യാദവിനെപോലെ മുതിര്‍ന്ന നേതാക്കളായ എം.പി വീരേന്ദ്രകുമാര്‍, അലിഅന്‍വര്‍ എന്നിവര്‍ അറിയിച്ചിട്ടുണ്ട്. ഇവരുടെ സഹായത്തോടെയാകും യാദവിന്റെ പുതിയ പാര്‍ട്ടി രൂപീകരണം. കഴിഞ്ഞദിവസം ശരത് യാദവ് ബിഹാറിലെ ജെ.ഡി.യു നേതാക്കളുമായി കൂടിക്കാഴ്ച നടത്തിയിരുന്നു. യാദവ് സമാനമനസ്‌കരായ പാര്‍ട്ടി നേതാക്കളുമായും ചര്‍ച്ചനടത്തിവരികയാണെന്ന് അദ്ദേഹവുമായി അടുപ്പമുള്ള ജെ.ഡി.യു നേതാവ് വിജയ് വര്‍മ എം.എല്‍.എ പറഞ്ഞു. ഇതുസംബന്ധിച്ച ഔദ്യോഗിക പ്രഖ്യാപനം ഈയാഴ്ചതന്നെയുണ്ടാകുമെന്നും അദ്ദേഹം അറിയിച്ചു.
അതേസമയം, ജെ.ഡി.യുവില്‍ അനിവാര്യമായ പിളര്‍പ്പ് ഉറപ്പായിരിക്കേ ശരത് യാദവ് പക്ഷത്തേക്കുള്ള ഒഴുക്ക് തടയാന്‍ നിതീഷ് വിഭാഗം നീക്കം തുടങ്ങിയിട്ടുണ്ട്. പാര്‍ട്ടി പിളര്‍പ്പിലേക്കുപോവുകയാണെന്ന കാര്യം നേതാക്കള്‍ പലരും തിരിച്ചറിയുന്നുണ്ട്. തങ്ങളുടെ മുതിര്‍ന്ന നേതാവായ ശരത് യാദവ് ഇപ്പോള്‍ വേറെവഴിയിലാണെന്നും ഏതുതീരുമാനം എടുക്കാനും അദ്ദേഹത്തിനു സ്വാതന്ത്ര്യമുണ്ടെന്നും പാര്‍ട്ടി വക്താവ് സഞ്ജയ് സിങ് പറഞ്ഞു. നിതീഷിന്റെ തീരുമാനത്തിനെതിരേ കേരളാഘടകം ഉള്‍പ്പെടെ രംഗത്തുവന്നെങ്കിലും എതിര്‍പ്പുകള്‍ തള്ളുകയാണ് അദ്ദേഹം ചെയ്തത്. യാദവ് പാര്‍ട്ടിവിടുമോയെന്ന മാധ്യമപ്രവര്‍ത്തകരുടെ ചോദ്യത്തിന്, അതൊക്കെ ആര്‍ക്കറിയാമെന്നും തന്റെ ഭാരം അത്രയും കുറയുമെന്നുമാണ് നിതീഷ് പ്രതികരിച്ചത്. ബിഹാറിലെ ജെ.ഡി.യു മാത്രമാണ് അംഗീകൃത പാര്‍ട്ടിയെന്നും മറ്റു സംസ്ഥാനങ്ങളിലെ പാര്‍ട്ടി ഘടകങ്ങളുടെ നിലപാട് തന്നെ ബാധിക്കില്ലെന്നും നിതീഷ് കൂട്ടിച്ചേര്‍ത്തു.
നിതീഷിന്റെ കൂറുമാറ്റത്തോട് അഞ്ചുദിവസത്തോളം മൗനംതുടര്‍ന്ന യാദവ്, തിങ്കളാഴ്ചയാണ് പരസ്യമായി വിയോജിപ്പ് അറിയിച്ചത്. തീരുമാനം ദൗര്‍ഭാഗ്യകരമാണ്. നിതീഷിന്റെ നിലപാട് അംഗീകരിക്കാന്‍ കഴിയില്ല. ജനങ്ങളുമായുണ്ടാക്കിയ കരാര്‍ പൊളിക്കുന്നത് ഗൗരവമുള്ള കാര്യമാണ്. മഹാസഖ്യത്തെ വിശ്വസിച്ചാണ് അവര്‍ വോട്ട്‌ചെയ്തതെന്നും ശരത് യാദവ് അഭിപ്രായപ്പെട്ടിരുന്നു.