തിരുവനന്തപുരം: വിഴിഞ്ഞം കാഞ്ഞിരം കുളത്ത് പട്ടാപ്പകല്‍ വിദ്യാര്‍ഥിനിയെ ആക്രമിക്കാന്‍ ശ്രമിച്ചയാളെ പൂവാര്‍ പൊലിസ് പിടികൂടി. നെല്ലിമൂട് മാങ്കാല ഭവനില്‍ സജീവ് (44) ആണ് പിടിയിലായത്. ഇയാളെ പിന്നീടു ജാമ്യത്തില്‍ വിട്ടു. കഴിഞ്ഞ ദിവസംകാഞ്ഞിരംകുളം മുള്ളുവിളക്ക് സമീപമായിരുന്നു സംഭവം. പെണ്‍കുട്ടിയെ ആക്രമിച്ച സംഭവമായതിനാല്‍ പോക്‌സോ ചുമത്തണമെന്ന് ആവശ്യമുയര്‍ന്നെങ്കിലും പരാതിയുമായി മുന്നോട്ടു പോകാന്‍ പെണ്‍കുട്ടിയുടെ രക്ഷിതാക്കള്‍ വിസമ്മതിച്ചതിനെ തുടര്‍ന്നാണു പൊതുസ്ഥലത്ത് അശ്ലീലം കാണിച്ചുവെന്ന നിസാര കുറ്റം ചുമത്തേണ്ടി വന്നതെന്ന് പൊലിസ് പറഞ്ഞു. ദിവസവും സ്റ്റേഷനില്‍ എത്തണമെന്ന നിബന്ധനയോടെയാണ് ജാമ്യം നല്‍കിയത്.
സ്ഥിരം ശല്യക്കാരനായ ഇയാള്‍ പെണ്‍കുട്ടിയെ ആക്രമിക്കാന്‍ ശ്രമിക്കുന്നത് കണ്ട് ഇയാളെ പിടികൂടിയ നാട്ടുകാര്‍ കൈകാര്യം ചെയ്ത ശേഷം ഇയാള്‍ ഓടിച്ചിരുന്ന സ്‌കൂട്ടറും അടിച്ച് തകര്‍ത്തിരുന്നു. സ്‌കൂട്ടര്‍ പൂവാര്‍ പൊലിസിന്റെ കസ്റ്റഡിയിലാണ്.