ജിദ്ദ: സഊദിയിലെ ത്വാഇഫിൽ വാഹനങ്ങൾ കൂട്ടിയിടിച്ചു നാല് ഇന്ത്യക്കാർ മരിച്ചു. ഉത്തർ പ്രദേശ് സ്വദേശികളായ ഷൗക്കത്ത് അലി, ബൈരിലാൽ ശിവ് ബാലക്, രാജസ്ഥാൻ സ്വദേശിയായ ഗീവർദാലി ചന്ദ്, മുംബൈ സ്വദേശിയായ ഫൈദ ഹുസ്സൈൻ സിദ്ധീഖി എന്നിവരാണ് മരിച്ചത്. ഇവരുടെ
മൃതദേഹങ്ങള്‍ കിങ് ഫൈസല്‍ ആശുപത്രിയിൽ സൂക്ഷിച്ചിരിക്കുകയാണ്.
അപകടത്തിൽ 17 പേ൪ക്കു പരിക്കേറ്റു. ഇവരിൽ ആറു പേരുടെ നില ഗുരുതരമാണ്. പരിക്കേറ്റവരിൽ ഇന്ത്യക്കാര്‍ക്ക് പുറമേ ബംഗ്ലദേശ്, പാക്കിസ്ഥാനി തൊഴിലാളികളടക്കം 24 പേരാണ് വാഹനത്തില്‍ ഉണ്ടായിരുന്നത്.
ത്വാഇഫിൽ നിന്ന് സെയിൽ വഴി മക്കയിലേക്കുള്ള റോഡിൽ ശറഫിയ എന്ന സ്ഥലത്തുവെച്ച്‌ ബുധനാഴ്ച രാവിലെ ഏഴു മണിക്കായിരുന്നു അപകടം. നെസ്‌മ കമ്പനി ജീവനക്കാർ സഞ്ചരിച്ച ഡൈന വാഹനത്തിൽ അതിവേഗത്തിൽ വന്ന സ്വദേശി യുവാവിന്റെ കാർ വന്നിടിക്കുകയായിരുന്നു. അപകടത്തിൽ കാറോടിച്ച യുവാവിന്‍റെയും നില ഗുരുതരമാണ്.
റെഡ് ക്രസന്റ് പ്രവര്‍ത്തകരും ആരോഗ്യ വകുപ്പ് സംഘങ്ങളും രക്ഷാപ്രവര്‍ത്തനം നടത്തുകയും പരിക്കേറ്റവര്‍ക്ക് പ്രാഥമിക ശുശ്രൂഷ നല്‍കുകയും ചെയ്തു. പരിക്കേറ്റവരില്‍ എട്ടു പേരെ തായിഫ് കിംഗ് അബ്ദുല്‍ അസീസ് സ്‌പെഷ്യലിസ്റ്റ് ആശുപത്രിയിലും ആറു പേരെ കിംഗ് ഫൈസല്‍ ആശുപത്രിയിലും മൂന്നു പേരെ പ്രിന്‍സ് മന്‍സൂര്‍ മിലിറ്ററി ആശുപത്രിയിലും റെഡ് ക്രസന്റ് ആംബുലന്‍സുകളില്‍ എത്തിച്ചു. രണ്ടു പേരെ ആരോഗ്യ വകുപ്പ് ആംബുലന്‍സിലും ആശുപത്രിയിലെത്തിച്ചു. പരിക്കേറ്റവരില്‍ ആറു പേരുടെ നില ഗുരുതരമാണെന്ന് തായിഫ് റെഡ് ക്രസന്റ് വക്താവ് പറഞ്ഞു. ആശുപത്രിയില്‍ ചികിത്സയില്‍ കഴിയുന്നവര്‍ക്ക് സഹായവുമായി തായിഫ് കെ. എം.സി.സി പ്രസിഡണ്‍ന്റ് മുഹമ്മദ് സാലിഹിന്റെ നേതൃത്വത്തില്‍ പ്രവര്‍ത്തകര്‍ രംംഗത്തുണ്ട്.