കോഴിക്കോട്: കനോലി കനാലിലും കല്ലായി പുഴയിലും മാലിന്യം നിക്ഷേപിക്കുന്നവര്‍ക്കെതിരേ ജില്ലാ കലക്ടര്‍ കര്‍ശന ശിക്ഷാ നടപടികള്‍ സ്വീകരിക്കണമെന്ന് സംസ്ഥാന മനുഷ്യാവകാശ കമ്മിഷന്‍ ജുഡീഷ്യല്‍ അംഗം പി. മോഹനദാസ് ഉത്തരവിട്ടു.
മാലിന്യം നിക്ഷേപിക്കുന്നതിനെതിരേ പരസ്യബോര്‍ഡുകള്‍ സ്ഥാപിക്കണമെന്നും കമ്മിഷന്‍ ആവശ്യപ്പെട്ടു. മാലിന്യം നിക്ഷേപിക്കുന്നത് നിരോധിക്കാന്‍ സി.സി.റ്റി.വി കാമറകള്‍ സ്ഥാപിക്കാന്‍ ജില്ലാ കലക്ടര്‍ നഗരസഭ, പഞ്ചായത്ത് അധികൃതരുമായി ആലോചിച്ച് നടപടി സ്വീകരിക്കണം. കോഴിക്കോട് നഗരസഭാ സെക്രട്ടറിയും ജില്ലാ പൊലിസ് മേധാവിയും മാലിന്യമുക്തമാക്കുന്നതിന് നടപടി സ്വീകരിക്കണം.
കനോലി കനാലിന്റെയും കല്ലായിപുഴയുടെയും ശോചനീയാവസ്ഥക്കെതിരെ എ.സി ഫ്രാന്‍സിസ് നല്‍കിയ പരാതിയിലാണ് നടപടി. കമ്മിഷന്‍ ജില്ലാ കലക്ടറില്‍ നിന്നും റിപ്പോര്‍ട്ട് വാങ്ങിയിരുന്നു. കല്ലായി പുഴയിലെ കൈയേറ്റങ്ങള്‍ ഒഴിപ്പിക്കാന്‍ നടപടികള്‍ ആരംഭിച്ചതായി റിപ്പോര്‍ട്ടില്‍ പറയുന്നു. എന്നാല്‍ പ്രദേശവാസികളായ ചിലരില്‍ നിന്നും എതിര്‍പ്പുണ്ടായി. ഹൈക്കോടതിയിലെ കേസിനെ തുടര്‍ന്ന് ഒഴിപ്പിക്കല്‍ നടപടികള്‍ നിലച്ചു. എങ്കിലും കോടതി നിര്‍ദേശ പ്രകാരം നടപടി സ്വീകരിക്കുന്നുണ്ട.് ഉള്‍നാടന്‍ ജലപാത വികസനവുമായി ബന്ധപ്പെട്ട പദ്ധതി സര്‍ക്കാര്‍ സമര്‍പ്പിച്ച സാഹചര്യത്തില്‍ ജില്ലാകലക്ടര്‍ കനോലി കനാലിലെയും കല്ലായി പുഴയിലെയും മാലിന്യം നീക്കം ചെയ്യാന്‍ നടപടിയെടുക്കണമെന്നും കമ്മീഷന്‍ ആവശ്യപ്പെട്ടു.