കൊയിലാണ്ടി: ഭൂരേഖ കംപ്യൂട്ടര്‍വല്‍ക്കരണം എന്ന ഊരാക്കുരുക്കില്‍പെട്ട് ഭൂനികുതി ഒടുക്കാനാകാതെ ഉടമകള്‍ നെട്ടോട്ടമോടുന്നു. സര്‍ക്കാര്‍ സമയബന്ധിതമായി റീസര്‍വേ നടപടികള്‍ പൂര്‍ത്തിയാക്കാത്തതും ഭൂപ്രമാണങ്ങള്‍ ആധാറുമായി ബന്ധിപ്പിക്കാന്‍ കഴിയാത്തതുമാണ് നികുതിദായകര്‍ക്ക് വിനയാകുന്നത്. പല വില്ലേജുകളിലെയും സ്ഥിതി ഇതുതന്നെ. നേരത്തെ വില്ലേജ് ഓഫിസുകളില്‍നിന്ന് നികുതിയടച്ച് രശീതി വാങ്ങാമായിരുന്നെങ്കില്‍ ഇപ്പോള്‍ കംപ്യൂട്ടര്‍ വഴിയാണ് നടപടി ക്രമങ്ങള്‍. ഇതിനായി ഒരേസമയം വില്ലേജ് ഓഫിസുകളിലും അക്ഷയ കേന്ദ്രങ്ങളിലും മാറിമാറി കയറിയിറങ്ങേണ്ട ഗതികേടിലാണ് ഭൂഉടമകള്‍. നികുതി ഒടുക്കാന്‍ ആദ്യം മുന്‍വര്‍ഷത്തെ നികുതി ചീട്ടും പ്രമാണങ്ങളുമായി വില്ലേജ് ഓഫിസില്‍ പോകണം. അവിടെനിന്ന് കംപ്യൂട്ടറില്‍ രേഖപ്പെടുത്തിയ ശേഷം അക്ഷയ കേന്ദ്രത്തിലെത്തി ആധാരം ലിങ്ക് ചെയ്യണം. തുടര്‍ന്ന് വീണ്ടും വില്ലേജ് ഓഫിസില്‍ എത്തി അനന്തര നടപടിക്ക് കാത്തുനില്‍ക്കണം. ഇതെല്ലാം കഴിയുമ്പോഴേക്കും ഒന്നുകില്‍ ഓഫിസ് സമയം കഴിഞ്ഞിരിക്കും. അല്ലെങ്കില്‍ ഉദ്യോഗസ്ഥര്‍ ഫീല്‍ഡ് ഡ്യൂട്ടിയുടെ പേരില്‍ സ്ഥലം വിട്ടിരിക്കും. ഫലത്തില്‍ നികുതി ദായകര്‍ ത്രിശങ്കുവില്‍തന്നെ.
ഇതിനുപുറമെ സാമ്പത്തികബാധ്യതയും വിനയാകുന്നുണ്ട്. നികുതി ഇനത്തില്‍ ആറുരൂപയും പത്തു രൂപയും അടക്കേണ്ട സ്ഥാനത്ത് കംപ്യൂട്ടര്‍ നടപടിക്രമങ്ങള്‍ക്കായി 30 മുതല്‍ 80 രൂപ വരെയാണ് അക്ഷയകേന്ദ്രങ്ങളില്‍ അടക്കേണ്ടി വരുന്നത്. ഭൂരേഖകള്‍ കംപ്യൂട്ടര്‍വല്‍ക്കരിക്കുന്നതിനായി ഒരുവര്‍ഷം മുന്‍പ് റവന്യു വകുപ്പ് സ്‌കൂളുകള്‍ കേന്ദ്രമാക്കി ക്യാംപ് സംഘടിപ്പിച്ചിരുന്നു. എന്നാല്‍ ക്യാംപില്‍ വച്ച് ഭൂഉടമകളോട് വാങ്ങിയ രേഖകള്‍ ഇപ്പോഴും താലൂക്ക് ഓഫിസില്‍ കെട്ടിക്കിടക്കുകയാണ്. ഈ രേഖകള്‍ കംപ്യൂട്ടറിലേക്ക് മാറ്റാനുള്ള നടപടികള്‍ ഇതുവരെ പൂര്‍ത്തീകരിച്ചിട്ടില്ലെന്നതും പ്രശ്‌നം രൂക്ഷമാക്കുന്നു.
ബാങ്ക് വായ്പകള്‍, തദ്ദേശഭരണ സ്ഥാപനങ്ങള്‍, കൃഷിഭവന്‍ തുടങ്ങിയവയില്‍ നിന്നുള്ള ആനുകൂല്യങ്ങള്‍, മറ്റ് ഔദ്യോഗിക നടപടി ക്രമങ്ങള്‍ എന്നിവയ്ക്കായി നികുതി രശീതികള്‍ ഹാജരാക്കാനാവാത്ത അവസ്ഥയിലാണ് ഭൂ ഉടമകള്‍.