പനമരം: മാനന്തവാടിയില്‍ നിന്ന് പീച്ചംകോട് പാതിരിച്ചാലിലേക്കുള്ള ബസ് സര്‍വിസ് കെ.എസ്.ആര്‍.ടി.സി നിര്‍ത്തിയതോടെ രോഗികളും വിദ്യാര്‍ഥികളും ദുരിതത്തില്‍. അംബേദ്ക്കര്‍ ട്രൈബല്‍ ആശുപത്രിയിലേക്കുള്ള നൂറുകണക്കിന് രോഗികളാണ് ബസ് സര്‍വിസ് ഇല്ലാതായതോടെ ദുരിതത്തിലായിരിക്കുന്നത്.
നിലവില്‍ രോഗികള്‍ നാലാംമൈലില്‍ നിന്നും നൂറു രൂപ മുടക്കി ഓട്ടോറിക്ഷ സര്‍വിസിനെ ആശ്രയിക്കേണ്ട സ്ഥിതിയാണുള്ളത്. ആവശ്യത്തിന് യാത്രക്കാരില്ലാത്തതിനാല്‍ സര്‍വിസുകളെല്ലാം നഷ്ടത്തിലാണെന്ന കാരണം പറഞ്ഞാണ് അധികൃതര്‍ ബസ് സര്‍വിസ് നിര്‍ത്തലാക്കിയത്.
ഇതോടെ ട്രൈബല്‍ ഹയര്‍ സെക്കന്‍ഡറി സ്‌കൂള്‍, ദ്വാരക ഹൈസ്‌കൂള്‍, കല്ലോടി ഹൈസ്‌കൂള്‍ എന്നിവിടങ്ങളിലേക്കുള്ള പ്രദേശത്തെ വിദ്യാര്‍ഥികളും യാത്രാക്ലേശം അനുഭവിക്കുകയാണ്. നാലുമാസമായി ഈ റൂട്ടിലുള്ള സര്‍വിസുകള്‍ മുടങ്ങുന്നത് പതിവായിരുന്നു. വിദ്യാര്‍ഥികള്‍ക്കും രോഗികള്‍ക്കും ഏറെ ഉപകാരപ്രദമായിരുന്ന കെ.എസ്.ആര്‍.ടി.സി സര്‍വിസുകള്‍ പുനരാരംഭിക്കണമെന്നാണ് നാട്ടുകാരുടെ ആവശ്യം.