ശ്രീനഗര്‍: ജമ്മുകശ്മിരില്‍ സുരക്ഷാ സേനയുമായുണ്ടായ ഏറ്റുമുട്ടലില്‍ ഹിസ്ബുല്‍ മുജാഹിദീന്‍ ഭീകരന്‍ കൊല്ലപ്പെട്ടു. ഏറ്റുമുട്ടലില്‍ പ്രദേശ വാസിയായ ഒരാളും കൊല്ലപ്പെട്ടിട്ടുണ്ട്. സംഭവത്തില്‍ രാഷ്ട്രീയ റൈഫിള്‍സ് ജവാന് പരുക്കേറ്റിട്ടുണ്ട്.
ദക്ഷിണ കശ്മിരിലെ അനന്ദ്‌നാഗ് ജില്ലയിലാണ് വ്യാഴാഴ്ച രാത്രി ഏറ്റുമുട്ടലുണ്ടായത്. മൂന്ന് ഭീകരര്‍ അനന്ദ്‌നാഗിലെ കാര്‍വലില്‍ ഒളിച്ചുകഴിയുന്നുണ്ടെന്ന വിവരം ലഭിച്ചതോടെ സുരക്ഷാ സേന ഇവിടം വളഞ്ഞ് തെരച്ചില്‍ നടത്തുന്നതിനിടയിലാണ് പരസ്പരം ഏറ്റുമുട്ടലുണ്ടായത്.
കൊല്ലപ്പെട്ട ഭീകരനെ തിരിച്ചറിഞ്ഞതായി പൊലിസ് അറിയിച്ചു. യവര്‍ നിസാര്‍ എന്ന അല്‍ഗാസിയാണ് കൊല്ലപ്പെട്ടതെന്നും മറ്റ് രണ്ട് ഭീകരര്‍ക്കുവേണ്ടി തെരച്ചില്‍ തുടരുകയാണെന്നും സുരക്ഷാ സേന അറിയിച്ചു. സൈന്യത്തിനുനേരെ കല്ലേറ് നടത്തിയതുള്‍പ്പെടെ നിരവധി ആക്രമണകേസുകളില്‍ പ്രതിയാണ് ഇയാള്‍.