ന്യൂഡല്‍ഹി: മുന്‍ കേന്ദ്രമന്ത്രിയും കോണ്‍ഗ്രസ് നേതാവുമായ ശശിതരൂര്‍ നല്‍കിയ മാനനഷ്ടക്കേസില്‍ ഡല്‍ഹി ഹൈക്കോടതി റിപബ്ലിക് ടി.വിക്ക് നോട്ടിസയച്ചു. ഭാര്യ സുനന്ദാ പുഷ്‌കറിന്റെ മരണവുമായി ബന്ധപ്പെട്ട് മെയ് എട്ടിനും 13നും ഇടയില്‍ ചാനല്‍ സംപ്രേഷണംചെയ്ത വാര്‍ത്തകള്‍ തനിക്കു മാനഹാനിയുണ്ടാക്കുന്നതാണ് എന്നാരോപിച്ച് ചാനല്‍ ഉടമകളായ എ.ആര്‍.ഡി ഔട്ട്‌ലെയര്‍ മീഡിയ ആന്റ് ഏഷ്യാനെറ്റ് ന്യൂസ് പ്രൈവറ്റ് ലിമിറ്റഡ്, മാനേജിങ് ഡയറക്ടര്‍ അര്‍ണബ് ഗോസ്വാമി എന്നിവര്‍ക്കാണ് കോടതി നോട്ടിസയച്ചത്. തരൂരിനെ 'ക്രിമിനല്‍' പോലുള്ള പദങ്ങള്‍ ഉപയോഗിക്കാന്‍ പാടില്ലെന്നു പറഞ്ഞ കോടതി, മാനനഷ്ടകേസില്‍ ഈ മാസം 16നകം വിശദീകരണം നല്‍കാനും ആവശ്യപ്പെട്ടു. എന്നാല്‍, തെളിവുകളും പൊലിസിന്റെ റിപ്പോര്‍ട്ടും ഉദ്ധരിച്ചുമാത്രമാണ് തങ്ങള്‍ വാര്‍ത്ത സംപ്രേഷണംചെയ്തതെന്ന് അര്‍ണബിനു വേണ്ടി ഹാജരായ അഭിഭാഷകന്‍ സന്ദീപ് സേത്തി പറഞ്ഞു.
കേസില്‍ ഒരുകോടതിയും നിഗമനത്തിലെത്തും മുമ്പ് തന്നെ അതുമായി ബന്ധപ്പെട്ട് 'സുനന്ദയുടെ കൊലപാതകം' എന്ന വിധത്തില്‍ വാര്‍ത്തകൊടുക്കുന്നതില്‍ നിന്ന് ചാനലിനെ വിലക്കണമെന്ന് തരൂരിനു വേണ്ടി ഹാജരായ മുതിര്‍ന്ന അഭിഭാഷകനും കോണ്‍ഗ്രസ് നേതാവുമായ സല്‍മാന്‍ ഖുര്‍ഷിദ് ആവശ്യപ്പെട്ടു.