മുക്കം: നഗരസഭയിലെ സി.പി.എം വനിതാ കൗണ്‍സിലര്‍ അഡ്മിനായ വാട്‌സ് ആപ്പ് ഗ്രൂപ്പില്‍ ബ്രാഞ്ച് സെക്രട്ടറി അശ്ലീല വിഡിയോ പോസ്റ്റ് ചെയ്തത് വിവാദമായി. രണ്ടു ദിവസം മുന്‍പാണ് രാവിലെ ബ്രാഞ്ച് സെക്രട്ടറി പത്തു മിനുട്ടിലധികം ദൈര്‍ഘ്യമുള്ള വിഡിയോ പോസ്റ്റ് ചെയ്തത്.  സ്ത്രീകളും യുവാക്കളുമുള്‍പ്പെടെ നിരവധി പേരുള്ള ഗ്രൂപ്പില്‍ സംഭവം വിവാദമായതോടെ ആരോ കൗണ്‍സിലറെ വിവരമറിയിക്കുകയായിരുന്നു. അപ്പോഴേക്കും കാര്യങ്ങള്‍ കൈവിട്ടു പോവുകയും ചെയ്തു.  നിരവധി പേര്‍ വിഡിയോ ഡൗണ്‍ലോഡ് ചെയ്യുകയും പലരും സ്‌ക്രീന്‍ ഷോട്ടെടുത്ത് മറ്റു പലര്‍ക്കും അയച്ചുകൊടുക്കുകയും ചെയ്തിരുന്നു. അതിനു ശേഷമാണ് പോസ്റ്റ് ചെയ്ത ബ്രാഞ്ച് സെക്രട്ടറിക്ക് വിഡിയോ ഡിലിറ്റ് ചെയ്യാനായത്. തന്റെ ജോലിക്കാരന്‍ ചെയ്തതാണെന്ന് പറഞ്ഞ് ബ്രാഞ്ച് സെക്രട്ടറി മാപ്പു പറഞ്ഞെങ്കിലും സംഭവം സി.പി.എമ്മില്‍ വിവാദമായിട്ടുണ്ട്. ഗ്രൂപ്പില്‍ നിന്ന് എല്ലാവരെയും പുറത്താക്കി ഗ്രൂപ്പ് പിരിച്ചുവിട്ടെങ്കിലും ബ്രാഞ്ച് സെക്രട്ടറിക്കെതിരേ നടപടിയാവശ്യപ്പെട്ട് ഒരു വിഭാഗം രംഗത്തെത്തിയിട്ടുണ്ട്. അതിനിടെ സംഭവം പരാതിയില്ലാതെ ഒതുക്കിത്തീര്‍ക്കാനും ശ്രമം നടക്കുന്നുണ്ട്.