തിരുവനന്തപുരം: കണ്ണൂരില്‍ ചരിത്ര കോണ്‍ഗ്രസിനിടെ ഉണ്ടായ പ്രതിഷേധത്തില്‍ നിലപാടിലുറച്ച് ഗവര്‍ണര്‍ ആരിഫ് മുഹമ്മദ് ഖാന്‍.
ഭരണഘടന സംരക്ഷിക്കേണ്ടത് തന്റെ ബാധ്യതയാണെന്നും അതിനായി ഏതറ്റംവരെയും പോകുമെന്നും അദ്ദേഹം തിരുവനന്തപുരത്ത് പറഞ്ഞു. പാര്‍ലമെന്റ് പാസാക്കിയ നിയമത്തെ സംരക്ഷിക്കാനായി ഏതറ്റം വരെയും പോകും. അത് തന്റെ ഭരണഘടനാപരമായ കര്‍ത്തവ്യമാണ്. പാര്‍ട്ടികളുടെ രാഷ്ട്രീയ അജന്‍ഡയുമായി തനിക്ക് ബന്ധമില്ല. തനിക്ക് ഒപ്പമുള്ളവരെ ഇര്‍ഫാന്‍ ഹബീബ് കൈയേറ്റം ചെയ്തു. ഇതിലും മോശമായ സാഹചര്യം താന്‍ നേരിട്ടിട്ടുണ്ട്. മുന്‍പ് മൂന്ന് തവണ ആക്രമിക്കപ്പെട്ടിട്ടുണ്ട്. ഇത്തരം കാര്യങ്ങള്‍ തന്നെ ബാധിക്കാറില്ല. അഭിപ്രായ വ്യത്യാസം ജനാധിപത്യത്തിന്റെ ഭാഗമാണ്. അതില്‍ തനിക്ക് എതിര്‍പ്പില്ലെന്നും ഗവര്‍ണര്‍ തിരുവനന്തപുരത്ത് മാധ്യമപ്രവര്‍ത്തകരുടെ ചോദ്യങ്ങള്‍ക്ക് മറുപടി പറഞ്ഞു.