കല്‍പ്പറ്റ: അന്തര്‍ദേശീയ ചക്കമഹോത്സവം അമ്പലവയല്‍ കാര്‍ഷിക ഗവേഷണ കേന്ദ്രത്തില്‍ ഇന്ന് തുടങ്ങും. കേരളം ആദ്യമായിട്ടാണ് ഇത്തരത്തില്‍ വിപുലമായ ചക്കമേളക്ക് വേദിയാകുന്നത്. ലോകത്തിന്റെ വിവിധഭാഗങ്ങളിലുള്ള പതിനേഴോളം വിദഗ്ധരാണ് മേളയില്‍ വ്യത്യസ്ത പ്രബന്ധങ്ങള്‍ അവതരിപ്പിക്കുക.
ചക്കയുടെ ഉപോല്‍പ്പന്നങ്ങളെ പരിചയപ്പെടുത്തുന്നതിനും മൂല്യവര്‍ധിത ഉല്‍പന്നം എന്ന നിലയിലുള്ള സാധ്യതകളും മേളയില്‍ ചര്‍ച്ചചെയ്യും. 14 വരെയാണ് അമ്പലവയലിലെ പ്രത്യേകം തയാറാക്കിയ പവലിയനില്‍ ചക്കമഹോത്സവം നടക്കുന്നത്. ഇതോടനുബന്ധിച്ച് മിനി പൂപ്പൊലിയും നടക്കും. ചക്കയും ഗവേഷണവും എന്ന വിഷയത്തിലാണ് ആദ്യദിവസം ശില്‍പ്പശാല നടക്കുക.
വാണിജ്യാടിസ്ഥാനത്തിലുള്ള കൃഷിയും വിപണനവും മൂല്യവര്‍ധിത ഉല്‍പന്നങ്ങളുടെ നിര്‍മ്മിതി, വിപണന സാധ്യതകള്‍ എന്നിവയെല്ലാം ചര്‍ച്ചചെയ്യും. ചക്കയുടെ വ്യവസായവത്കരണം എന്ന വിഷയത്തിലാണ് രണ്ടാം ദിവസത്തെ ശില്‍പ്പശാല.
ഉല്‍പന്ന വൈവിധ്യവല്‍കരണം, സംസ്‌കരണത്തിനുള്ള യന്ത്രങ്ങളുടെ നിര്‍മ്മിതിയും ഉപയോഗവും, നൂതന പാക്കേജിങ് എന്നിവയെല്ലാമാണ് ചര്‍ച്ച ചെയ്യുന്നത്. ചക്കയുടെ പോഷക ഗുണവും ഔഷധ ഗുണവും ചര്‍ച്ചചെയ്യുന്ന സെമിനാറാണ് മൂന്നാം ദിവസം നടക്കുക.
നാലാം ദിവസം ചക്കയുടെ സാമൂഹ്യ ഭക്ഷ്യസുരക്ഷയും അഞ്ചാംദിവസം ചക്കയുടെ വിവിധ ഉല്‍പന്ന വിപണനത്തിനും പ്രചാരണത്തിനുമുള്ള ഏജന്‍സികളും അവയുടെ സാധ്യതകളുമാണ് ശില്‍പ്പശാലയില്‍ ചര്‍ച്ച ചെയ്യുക.