ന്യൂഡല്‍ഹി: ലോക ബാഡ്മിന്റണ്‍ ചാംപ്യന്‍ഷിപ്പില്‍ ഇന്ത്യയുടെ ഒളിംപിക് വെള്ളി മെഡല്‍ ജേതാവ് പി.വി സിന്ധുവും ലോക എട്ടാം നമ്പര്‍ താരം കിദംബി ശ്രീകാന്തിനും ടോപ് സീഡ്. ഇരുവരും ആദ്യ പത്തില്‍ ഇടംപിടിച്ചിട്ടുണ്ട്. സിന്ധു നാലാം സീഡും ശ്രീകാന്ത് എട്ടാം സീഡുമാണ്.
ഗ്ലാസ്‌ഗോയില്‍ ഈ മാസം 21നാണ് ടൂര്‍ണമെന്റ് ആരംഭിക്കുന്നത്. ഒളിംപിക് ജേതാവ് കരോലിന മരിന് താഴെയാണ് സിന്ധുവിന്റെ സീഡ്. മറ്റൊരു സൂപ്പര്‍ താരം സൈന നേഹ്‌വാള്‍ 12ാം സീഡ് താരമാണ്. ലോക ഒന്നാം നമ്പര്‍ ചൈനീസ് തായ്‌പേയ് താരം തായ്‌സു യിങ് ടൂര്‍ണമെന്റില്‍ നിന്ന് പിന്‍മാറിയതോടെ ജപ്പാന്റെ അകാനെ യമാഗുച്ചി ഒന്നാം സീഡ് താരമായി. കൊറിയയുടെ സുങ് ജി യുന്നാണ് രണ്ടാം സീഡ്.