അമ്പലവയല്‍: ചക്കയുടെ ആരോഗ്യ പോഷക സുരക്ഷ പ്രചരിപ്പിച്ച്, ചക്കയുടെ മൂല്യവര്‍ധനവും, പ്ലാവ് കൃഷിയും പ്രോത്സാഹിപ്പിക്കണമെന്ന് മലേഷ്യയില്‍ നിന്നുള്ള ഉഷ്ണമേഖല പഴവര്‍ഗ്ഗ ശൃംഖല ചീഫ് എക്‌സിക്യൂട്ടിവ് ഓഫിസര്‍ ഡോ. മുഹമ്മദ് ദേശാ ഹസ്സിം പറഞ്ഞു. ചക്കയുടെ മൂല്യവര്‍ധനവും വിപണിയും എന്ന സാങ്കേതിക സെമിനാര്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
കേരളവുമായി സാങ്കേതികവിദ്യ കൈമാറ്റത്തിനും മൂല്യവര്‍ധിത ഉല്‍പ്പന്ന നിര്‍മാണ പരിശീലനത്തിനും ചെറുകിട നാമമാത്ര കര്‍ഷകര്‍ക്ക് പ്രയോജനകരമായ രീതിയില്‍ ചക്കയുടെ സാധ്യതകള്‍ പ്രചരിപ്പിക്കുന്നതിനും സഹകരിക്കുമെന്ന് അദ്ദേഹം പറഞ്ഞു.
കേരള കാര്‍ഷിക സര്‍വകലാശാല വൈസ് ചാന്‍സലര്‍ ഡോ. പി രാജേന്ദ്രന്‍ അധ്യക്ഷനായി. ജില്ലാ സെഷന്‍ ജഡ്ജി പി.വി വിജയകുമാര്‍, ജില്ല പൊലിസ് മേധാവി രാജ്പാല്‍ മീണ, കേരളാ കാര്‍ഷിക സര്‍വകലാശാല വിജ്ഞാനവിഭാഗം മേധാവി ഡോ. ജിജു പി അലക്‌സ്, നബാര്‍ഡ് ജില്ലാ മാനേജര്‍ എന്‍.എസ് സജികുമാര്‍, സര്‍വകലാശാല ഗവേഷണവിഭാഗം മേധാവി ഡോ. ഇന്ദിരാ ദേവി സംസാരിച്ചു.
ചടങ്ങിന് കാര്‍ഷിക സര്‍വകലാശാല രജിസ്ട്രാര്‍ ഡോ. എസ്. ലീനാകുമാരി സ്വാഗതവും കൃഷി വിജ്ഞാന കേന്ദ്രം കോഡിനേറ്റര്‍ ഡോ. എന്‍.ഇ. സഫിയ നന്ദിയും പറഞ്ഞു.