തിരുവനന്തപുരം: വനിതാമതില്‍ പൊളിയാതിരിക്കാന്‍ പ്രവര്‍ത്തനങ്ങള്‍ ഏകോപിപ്പിക്കാന്‍ ഇന്നലെ ചേര്‍ന്ന സി.പി.എം സംസ്ഥാന സെക്രട്ടേറിയറ്റ് തീരുമാനിച്ചു.
വനിതാമതില്‍ വന്‍ വിജയമാക്കാന്‍ എല്ലാ ഘടകങ്ങളെയും രംഗത്തിറക്കാന്‍ സെക്രട്ടേറിയറ്റ് തീരുമാനിച്ചു. ഇന്നും നാളെയുമായി നടക്കുന്ന സി.പി.എം സംസ്ഥാന സമിതിയില്‍ സംസ്ഥാന സെക്രട്ടറി കോടിയേരി ബാലകൃഷ്ണന്‍ സെക്രട്ടേറിയറ്റ് തീരുമാനം അറിയിക്കും. 30 ലക്ഷം വനിതകളെ മതിലിനായി ഒരുക്കണമെന്ന നിര്‍ദേശമാണ് സെക്രട്ടേറിയറ്റില്‍ ഉയര്‍ന്നത്. മറ്റു ഘടക കക്ഷികള്‍ക്ക് ഈ നിര്‍ദേശം നല്‍കാന്‍ എല്‍.ഡി.എഫ് കണ്‍വീനര്‍ എ.വിജയരാഘവനെ സെക്രട്ടേറിയറ്റ് ചുമതലപ്പെടുത്തി.
വനിതാമതില്‍ സര്‍ക്കാരിന്റെയും ഇടതുപക്ഷത്തിന്റെയും അഭിമാനപ്രശ്‌നമാണെന്നും അത് വന്‍ വിജയമാക്കണമെന്നും ഘടകകക്ഷികളെ ഇന്നലെ തന്നെ വിജയരാഘവന്‍ അറിയിച്ചു. ഡി.വൈ.എഫ്.ഐ, എസ്.എഫ്.ഐ, ജനാധിപത്യ മഹിളാ അസോസിയേഷന്‍, സി.ഐ.ടി.യു, എന്‍.ജി.ഒ യൂനിയന്‍, കെ.എസ്.ടി.എ, വിവിധ ട്രേഡ് യൂനിയന്‍ സംഘടനകള്‍ എന്നിവരോടും കൂടുതല്‍ വനിതകളെ പങ്കെടുപ്പിക്കാന്‍ സെക്രട്ടേറിയറ്റ് നിര്‍ദേശിച്ചു. ഇതുവരെ അവര്‍ നടത്തിയ പ്രചരണ പ്രവര്‍ത്തനങ്ങളെയും സെക്രട്ടേറിയറ്റ് അഭിനന്ദിച്ചു. കൂടാതെ കുടുംബശ്രീ പ്രവര്‍ത്തകരോടും വനിതകളെ രംഗത്തിറക്കാന്‍ നിര്‍ദേശിച്ചിട്ടുണ്ട്. വാഹനത്തില്‍ ഓരോ പ്രദേശത്തും വനിതകളെ ഇറക്കുന്നതിനായി സി.പി.എം പ്രവര്‍ത്തകര്‍ മുന്‍കൈ എടുക്കണമെന്ന് കീഴ്ഘടകങ്ങള്‍ക്ക് നിര്‍ദേശം നല്‍കാനും തീരുമാനിച്ചു.
സര്‍ക്കാരും ജില്ലാ ഭരണകൂടവും ഉണ്ടെങ്കിലും എല്ലായിടത്തും പ്രത്യേക ശ്രദ്ധ പതിപ്പിക്കാനാണ് സി.പി.എം കീഴ്ഘടകങ്ങള്‍ക്ക് നല്‍കിയിരിക്കുന്ന നിര്‍ദേശം. മുസ്‌ലിം, ക്രിസ്ത്യന്‍ വിഭാഗങ്ങളുടെ സാന്നിധ്യം കൂടുതലായി ഉണ്ടാകണമെന്നും നിര്‍ദേശമുണ്ട്.