മോണ്ട്‌റിയല്‍: കാനഡയുടെ കൗമാര താരം ഡെനിസ് ഷപോവ്‌ലോവ് സ്പാനിഷ് കരുത്തന്‍ റാഫേല്‍ നദാലിനെ അട്ടിമറിച്ചു. എ.ടി.പി മോണ്ട്‌റിയല്‍ മാസ്റ്റേഴ്‌സ് ടെന്നീസ് പോരാട്ടത്തിലാണ് നദാല്‍ 18കാരനായ താരത്തിന് മുന്നില്‍ അട്ടിമറി തോല്‍വി നേരിട്ടത്. ആദ്യ സെറ്റ് നേടിയ ശേഷമായിരുന്നു നദാലിന്റെ വന്‍ വീഴ്ച. സ്‌കോര്‍: 3-6, 6-4, 7-6 (7-4). തോല്‍വി നദാലിന്റെ ഒന്നാം റാങ്കിലെത്താനുള്ള മോഹത്തിന് തിരിച്ചടിയായും മാറി. വൈല്‍ഡ് കാര്‍ഡ് എന്‍ട്രിയായാണ് ഷപോവ്‌ലോവ് ടൂര്‍ണമെന്റില്‍ മത്സരിക്കാനെത്തിയത്.
മറ്റൊരു മത്സരത്തില്‍ സ്വിസ് ഇതിഹാസം റോജര്‍ ഫെഡറര്‍ മറ്റൊരു സ്പാനിഷ് പ്രമുഖന്‍ ഡേവിഡ് ഫെററെ കടുത്ത പോരാട്ടത്തില്‍ കീഴടക്കി ക്വാര്‍ട്ടറിലേക്ക് മുന്നേറി. കഴിഞ്ഞ പതിനാറ് മത്സരങ്ങളിലും ഫെറര്‍ക്ക് മുന്നില്‍ കീഴടങ്ങാതെ നിന്ന ഫെഡറര്‍ ഇത്തവണയും പതിവ് തെറ്റിച്ചില്ല. 14 വര്‍ഷങ്ങള്‍ക്ക് മുന്‍പാണ് ഫെറര്‍ അവസാനമായി ഫെഡററെ പരാജയപ്പെടുത്തിയത്. ആദ്യ സെറ്റ് നേടിയ ശേഷമാണ് ഫെറര്‍ തോല്‍വി സമ്മതിച്ചത്. സ്‌കോര്‍: 4-6, 6-4, 6-2. ആദ്യ സെറ്റ് ഫെറര്‍ വിജയിച്ചതോടെ വിവിധ ടൂര്‍ണമെന്റുകളിലായി ഫെഡറര്‍ ഒരു സെറ്റ് പോലും എതിരാളിക്ക് നല്‍കാതെ കുതിക്കുകയായിരുന്നു. വിവിധ ടൂര്‍ണമെന്റുകളിലായി തുടര്‍ച്ചയായി 32 സെറ്റുകളാണ് ഫെഡറര്‍ വിജയിച്ചത്. ഈ കുതിപ്പ് അവസാനിപ്പിക്കാന്‍ മാത്രം ആദ്യ സെറ്റ് വിജയത്തോടെ സാധിച്ചതാണ് ഫെഡറര്‍ക്ക് ആശ്വസിക്കാനുണ്ടായിരുന്ന ഏക ഘടകം.