കോഴിക്കോട്: 11ാമത് സില്‍വര്‍ ഹില്‍സ് ട്രോഫി ഓള്‍ കേരള ഇന്റര്‍ സ്‌കൂള്‍ ബാസ്‌ക്കറ്റ്‌ബോള്‍ ചാംപ്യന്‍ഷിപ്പില്‍ സെന്റ് മൈക്കിള്‍സ് എച്ച്.എസ്.എസ് കോഴിക്കോടും ലിറ്റില്‍ ഫ്‌ളവര്‍ എച്ച്.എസ്.എസ് കൊരട്ടിയും സെന്റ് ജോസഫ്‌സ് ജി.എച്ച്.എസ് ആലപ്പുഴയും പെണ്‍കുട്ടികളുടെവിഭാഗത്തില്‍ സെമി ഫൈനലിലെത്തി. ആതിഥേയരായ സില്‍വര്‍ ഹില്‍സ് എച്ച്.എസ്.എസ്, ഡോണ്‍ബോസ്‌കോ ഇരിങ്ങാലക്കുട, രാജഗിരി എച്ച്.എസ്.എസ് കളമശ്ശേരി, തിരുവനന്തപുരം സെന്റ് ജോസഫ്‌സ് എച്ച്.എസ്.എസ്, സേക്രഡ്ഹാര്‍ട്ട് ചങ്ങനാശ്ശേരി, തേവര എസ്.എച്ച് സി.എം.ഐ സ്‌കൂള്‍, ലിറ്റില്‍ ഫ്‌ളവര്‍ കൊരട്ടി എന്നീ ടീമുകള്‍ ആണ്‍കുട്ടികളുടെ വിഭാഗം ക്വാര്‍ട്ടറിലേക്കും മുന്നേറി.
ഗ്രൂപ്പ് എയിലെ ലീഗ് മത്സരത്തില്‍ സില്‍വര്‍ ഹില്‍സ് ഡോണ്‍ബോസ്‌കോ ഇരിങ്ങാലക്കുടയെ(64-44) എന്ന സ്‌കോറിന് തകര്‍ത്തു. ഗ്രൂപ്പ് ബിയില്‍ കളമശ്ശേരി രാജഗിരി സ്‌കൂള്‍ ഇന്‍ഫന്റ് ജീസസ് സ്‌കൂള്‍ മാവേലിക്കരയെയും (74-67) എസ്.എച്ച് സി.എം.ഐ തേവര, ദേവമാതാ എച്ച്.എസ്.എസിനേയും (43-23) തോല്‍പിച്ചു. മറ്റൊരു മത്സരത്തില്‍ സെന്റ് ജോസഫ്‌സ് എച്ച്.എസ്.എസ് സില്‍വര്‍ ഹില്‍സ് ബി ടീമിനെ അനായാസം കീഴടക്കി. പെണ്‍കുട്ടികളുടെ മത്സരത്തില്‍ സില്‍വര്‍ ഹില്‍സ് ബി ടീമിനെ തോല്‍പിച്ച് സെന്റ് മൈക്കിള്‍സ് ജി.എച്ച്.എസ് ജൈത്രയാത്ര തുടരുന്നു. ടൂര്‍ണമെന്റ് ഇന്ന് സമാപിക്കും.