ജാംഷഡ്പൂര്‍: മൂന്നു ഫാനും മൂന്നു ട്യൂബ്‌ലൈറ്റും ഒരു ടി.വിയും ഉപയോഗിച്ചതിന് മൂന്നു ബില്യണിന്റെ കറണ്ട് ബില്‍. തനിക്കു കിട്ടിയ കറണ്ട് ബില്‍ കണ്ട് ഷോക്കടിച്ചിരിക്കുകയാണ് ജാര്‍ഖണ്ഡ് സ്വദേശിയായ ബി.ആര്‍ ഗുഹ. ജാര്‍ഖണ്ഡ് ഇലക്ട്രിസിറ്റി ബോര്‍ഡില്‍ നിന്നും ഗുഹയ്ക്ക് കഴിഞ്ഞ ദിവസമാണ് ഞെട്ടിക്കുന്ന ബില്‍ ലഭിച്ചത്.

ബില്ലടച്ചില്ലെങ്കില്‍ വീട്ടിലെ വൈദ്യുതി ബന്ധം വിഛേദിക്കപ്പെടുമെന്ന ആശങ്കയിലാണ് അദ്ദേഹം. മൂന്നു റൂമുകളുള്ള വീട്ടില്‍ ആകെ ഉപയോഗിച്ചത് മൂന്നു ഫാനുകളും ലൈറ്റുകളും ടി.വിയും മാത്രം. പിന്നെ തങ്ങള്‍ക്കെങ്ങനെയാണ് ഇത്രയും ഭീമമായ തുക ബില്ലായി വന്നത് എന്നാണ് ഇവര്‍ ചോദിക്കുന്നത്.

തന്റെ പിതാവ് ഒരു പ്രഷര്‍ രോഗിയാണെന്നും അമ്മ പ്രമേഹ രോഗിയാണെന്നും ഗുഹയുടെ മകള്‍ രത്‌ന പറഞ്ഞു. വൈദ്യുതി വകുപ്പിനെതിരേ ഇവര്‍ പൊലിസില്‍ പരാതി നല്‍കിയിട്ടുണ്ട്.