ന്യൂഡല്‍ഹി: 9.3 കോടിയിലധികം പാന്‍ കാര്‍ഡുകള്‍ ആധാറുമായി ബന്ധിപ്പിച്ചതായി ആദായ നികുതി വകുപ്പ്. പാന്‍ കാര്‍ഡ്-ആധാര്‍ ബന്ധിപ്പിക്കലിനുള്ള അവസാന തിയതിയായിരുന്ന കഴിഞ്ഞ അഞ്ചുവരെയുള്ള കണക്കാണിത്.

മൊത്തം പാന്‍കാര്‍ഡുകളുടെ 30 ശതമാനമാണിത്. മൂന്നു കോടി ഉടമകള്‍ കഴിഞ്ഞ ജൂണ്‍-ജൂലൈ മാസങ്ങള്‍ക്കിടെയാണ് ആധാറുമായി ബന്ധിപ്പിച്ചതെന്ന് ഉദ്യോഗസ്ഥന്‍ പറഞ്ഞു. ആകെ 30 കോടി പാന്‍ കാര്‍ഡ് ഉടമകളാണ് രാജ്യത്തുള്ളത്.

ഈ മാസം 31 വരെ തിയതി നീട്ടിയതിനാല്‍ ഇനിയും എണ്ണത്തില്‍ വര്‍ധനവുമുണ്ടാകുമെന്നാണു പ്രതീക്ഷിക്കുന്നതെന്നും ഉദ്യോഗസ്ഥന്‍ പറഞ്ഞു. കഴിഞ്ഞ ജൂലൈ ഒന്നുമുതലാണ് നികുതി റിട്ടേണുകള്‍ സമര്‍പ്പിക്കാനും പുതിയ പാന്‍ കാര്‍ഡുകള്‍ ലഭിക്കാനുമായി ആധാറുമായി ബന്ധിപ്പിക്കല്‍ നിര്‍ബന്ധമാക്കിയത്.