കൊച്ചി: മുത്തലാഖ് ബില്ലിനെ സംബന്ധിച്ച് യു.ഡി.എഫിലും യു.പി.എയിലും വ്യക്തതക്കുറവില്ലെന്ന് കോണ്‍ഗ്രസ് നേതാവ് കെ സി വേണുഗോപാല്‍. മുത്തലാഖ് ബില്‍ ഇതേ രീതിയില്‍ രാജ്യസഭയില്‍ പാസാക്കാന്‍ അനുവദിക്കില്ല. ഇക്കാര്യത്തില്‍ പ്രതിപക്ഷ കക്ഷികളെല്ലാം ഒറ്റക്കെട്ടാണെന്നും കൊച്ചിയില്‍ മാധ്യമപ്രവര്‍ത്തകരോട് സംസാരിക്കവേ അദ്ദേഹം പറഞ്ഞു.

യോജിക്കാവുന്ന കക്ഷികളുടെയൊക്കെ പിന്തുണയോടെ ബില്ലിനെ എതിര്‍ക്കും. അണ്ണാ ഡിഎംകെ, തൃണമൂല്‍ കോണ്‍ഗ്രസ് തുടങ്ങിയ കക്ഷികളുടെ പിന്തുണ നേടാന്‍ കഴിഞ്ഞു. ലോക്‌സഭയിലെ വോട്ടെടുപ്പു ബഹിഷ്‌കരിക്കാനായിരുന്നു പൊതുധാരണ. വോട്ടെടുപ്പില്‍ പങ്കെടുത്തതു കൊണ്ടു കാര്യമില്ല എന്നതു പരിഗണിച്ചായിരുന്നു ബഹിഷ്‌കരണം. രാജ്യസഭയില്‍ തീര്‍ച്ചയായും ബില്ലിനെ എതിര്‍ത്തു വോട്ടു ചെയ്യാനാണു തീരുമാനം

ചര്‍ച്ചയില്‍ പങ്കെടുത്ത കോണ്‍ഗ്രസ് എംപിമാരും മറ്റു പ്രതിപക്ഷ കക്ഷികളും കേന്ദ്രത്തെ പിന്തുണയ്ക്കുന്ന എഐഎഡിഎംകെ പോലും ബില്ലിനെ എതിര്‍ത്തു. അതംഗീകരിക്കാതെ വന്നപ്പോഴാണ് വാക്കൗട്ട് നടത്തിയത്.

മുത്തലാഖ് ബില്‍ ചര്‍ച്ച ചെയ്ത ദിവസം മുസ്‌ലിം ലീഗ്‌ േദശീയ ജനറല്‍ സെക്രട്ടറി പി.കെ.കുഞ്ഞാലിക്കുട്ടി ലോക്‌സഭയില്‍ എത്താതിരുന്നതിനെക്കുറിച്ച് അദ്ദേഹം മറുപടി നല്‍കും. അതെക്കുറിച്ചു തനിക്ക് അഭിപ്രായം പറയാനാകില്ല. വിശദീകരണം ചോദിച്ചത് അദ്ദേഹത്തിന്റെ പാര്‍ട്ടിയിലെ ആഭ്യന്തര കാര്യമാണ്. പക്ഷേ, കുഞ്ഞാലിക്കുട്ടി മാത്രമല്ല അന്നു സഭയില്‍ എത്താതിരുന്നത്. സിപിഎം എംപിമാര്‍ എല്ലാവരും ഉണ്ടായിരുന്നോ? കേരളത്തില്‍നിന്നുള്ള സിപിഎം എംപിമാര്‍ ചര്‍ച്ചയില്‍ പങ്കെടുത്തില്ലല്ലോ?, അദ്ദേഹം ചോദിച്ചു.