കെയ്‌റോ: പിരമിഡുകള്‍ക്ക് സമീപം വിനോദ സഞ്ചാരികളുടെ ബസിനു നേരെയുണ്ടായ ആക്രമണത്തില്‍ പ്രതികരിച്ച് ഈജിപ്ഷ്യന്‍ സേന. അക്രമികള്‍ക്കെതിരെ നടത്തിയ സൈനികാക്രമണത്തില്‍ 40 പേരെ വധിച്ചു.

ഗിസ, വടക്കന്‍ സിനായ് മേഖലകളില്‍ നടത്തിയ റെയ്ഡിലാണ് ഇവരെ വധിച്ചത്.

ഗിസ പിരമിഡിനു സമീപത്ത് വെള്ളിയാഴ്ചയുണ്ടായ ആക്രമണത്തില്‍ മൂന്ന് വിയറ്റ്‌നാം വിനോദസഞ്ചാരികളാണ് കൊല്ലപ്പെട്ടത്. 11 പേര്‍ക്ക് പരുക്കേല്‍ക്കുകയും ഒരു ഈജിപ്ഷ്യന്‍ ഡ്രൈവര്‍ കൊല്ലപ്പെടുകയും ചെയ്തു.

ആക്രമണത്തിന്റെ ഉത്തരവാദിത്തം ആരും ഏറ്റെടുത്തില്ല.

ഈജിപ്തിന്റെ സമ്പദ്‌വ്യവസ്ഥയില്‍ നിര്‍ണായക സ്വാധീനമായി വളരുകയായിരുന്നു വിനോദസഞ്ചാരം. 2011 ലെ വിപ്ലവശേഷം ഈജിപ്തിലേക്കുള്ള സഞ്ചാരികളുടെ എണ്ണം ക്രമാതീതമായി ഉയര്‍ന്നിരുന്നു. അതിനുശേഷം ഇതാദ്യമായാണ് സഞ്ചാരികള്‍ക്കു നേരെ ഇങ്ങനെ ആക്രമണമുണ്ടാവുന്നത്.