ദുബൈ: 'രേഖകള്‍ ശരിയാക്കൂ, സ്വയം സംരക്ഷിക്കൂ' എന്ന സന്ദേശവുമായി യു.എ.ഇ ഗവണ്മെന്റ് പ്രഖ്യാപിച്ച പൊതുമാപ്പ് കാലാവധി അവസാനിച്ചു. ആഗസ്റ്റ് ഒന്നുമുതലാണ്  യു.എ.ഇയില്‍ പൊതുമാപ്പ് ആരംഭിച്ചത്. മൂന്നുമാസത്തേക്ക് പഖ്യാപിച്ച പൊതുമാപ്പിന്റെ കാലവധി രണ്ടു തവണകൂടി കൂട്ടുകയായിരുന്നു.

 

ഇന്ന് മുതല്‍ പിടിക്കപ്പെടുന്ന അനധികൃത താമസക്കാര്‍ക്കെതിരെ കര്‍ശന നടപടിയെടുക്കുമെന്ന് ഫെഡറല്‍ അതോരിറ്റി ഫോര്‍ ഐഡന്റിറ്റി ആന്റ് സിറ്റിസണ്‍ഷിപ്പ് അറിയിച്ചിട്ടുണ്ട്. കൃത്യമായ താമസരേഖകളില്ലതെ അനധികൃതമായി രാജ്യത്ത് താമസിച്ചിരുന്ന വിദേശികള്‍ക്ക് പിഴയോ മറ്റ് നിയമനടപടികളോ ഇല്ലതെതന്നെ രാജ്യംവിടാനും രേഖകള്‍ ശരിയാക്കി ഇവിടെതന്നെ തുടരാനും പൊതുമാപ്പ് അവസരമൊരുക്കി. 

 

ഒക്ടോബര്‍ 31 വരെയാണ് ആദ്യം കാലാവധി പ്രഖ്യാപിച്ചിരുന്നത്. നിരവധിപ്പേര്‍ക്ക് പൊതുമാപ്പ് ഉപയോഗപ്പെടുത്താന്‍ കഴിഞ്ഞില്ലെന്ന് വിവിധ രാജ്യങ്ങളുടെ എംബസികള്‍ അറിയിച്ചതിനെ തുടര്‍ന്നാണ് നേരത്തെ യു.എ.ഇ ഭരണകൂടം കാലാവധി നീട്ടി നല്‍കിയത്.  പുതിയ തൊഴില്‍ ലഭിച്ചവര്‍ക്ക് താമസം നിയമവിധേയമാക്കാനും  ജോലിയില്ലാതെ നില്‍ക്കുന്നവര്‍ക്ക് മറ്റ് ശിക്ഷകളൊന്നും അനുഭവിക്കാതെ രാജ്യം വിടാനുമുള്ള അവസരമാണ് ഉണ്ടായിരുന്നത്.ഇന്ത്യക്കാരടക്കം ആയിരക്കണക്കിന് അനധികൃത താമസക്കാര്‍ക്ക് ഈ കാലയളവില്‍ പിഴ അടക്കാതെ രാജ്യംവിടാന്‍ സാധിച്ചു. ആറുവര്‍ഷത്തിനുശേഷമാണ് യു.എ.ഇ.യില്‍ പൊതുമാപ്പ് പ്രഖ്യാപിച്ചത്.