മലപ്പുറം: എബിലിറ്റി ഫൗണ്ടേഷന്‍ ഫോര്‍ ദ ഡിസേബ്ള്‍ഡിന്റെ ആഭിമുഖ്യത്തില്‍ പുളിക്കല്‍ എബിലിറ്റി ക്യാംപസില്‍ ഇന്നു മുതല്‍ 14 വരെ എബിലിറ്റി ഫെസ്റ്റ് നടക്കുമെന്നു ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. 13ന് ഉച്ചക്ക് മൂന്നിന് ഇ.ടി മുഹമ്മദ് ബഷീര്‍ എം.പി ഉദ്ഘാടനം ചെയ്യും. ഇന്നു രാവിലെ പത്തിന് എബിലിറ്റി എക്‌സിബിഷന്‍ ഉദ്ഘാടനം നടക്കും.  വ്യത്യസ്ഥ വിഭാഗ സെമിനാറുകള്‍, കലാമത്സരങ്ങള്‍, വൈകല്യങ്ങളെ അതിജീവിച്ച പ്രതിഭകളെ ആദരിക്കല്‍ എന്നിവയാണ് പരിപാടികള്‍. ഖുര്‍ആന്‍ മലയാള പരിഭാഷയുടെ ബ്രയില്‍പതിപ്പ്, മൂല്യവത്തായ ഗ്രന്ഥങ്ങളുടെ ഓഡിയോ പതിപ്പുകള്‍, ഖുര്‍ആന്‍ ആംഗ്യഭാഷാ സി.ഡി എന്നിവയുടെ പ്രകാശനങ്ങള്‍, വൈകല്യങ്ങളെ അതിജീവിച്ച് കലാ-സാഹിത്യ-സാങ്കേതിക പരിജ്ഞാന-സ്‌പോര്‍ട്‌സ് മേഖലകളില്‍ ഉന്നത ശ്രേണിയില്‍ എത്തിയ പ്രതിഭകളെ ആദരിക്കല്‍ എന്നിവയാണ് പരിപാടികള്‍.
13ന് വൈകീട്ട് ഏഴ് മുതല്‍ വൈകല്യ ബാധിതരായ കലാപ്രതിഭകള്‍ അവതരിപ്പിക്കുന്ന കലാസന്ധ്യ മലപ്പുറം ഡി.വൈ.എസ്.പി എ.ശറഫുദ്ദീന്‍ ഉദ്ഘാടനം ചെയ്യും.  14ന് രാവിലെ 9.30 മുതല്‍ വിവിധ വേദികളിലായി അന്ധ-ബധിര വിഭാഗങ്ങളുടെ സെമിനാറുകള്‍, വനിതാ സമ്മേളനം എന്നിവ നടക്കും.ഉച്ചക്ക് 12.30ന്  സമാപന സമ്മേളനം  മന്ത്രി ഡോ. കെ.ടി ജലീല്‍ ഉദ്ഘാടനം ചെയ്യും.വാര്‍ത്താ സമ്മേളനത്തില്‍ ചെയര്‍മാന്‍ കെ.അഹമ്മദ് കുട്ടി, വൈസ് ചെയര്‍മാന്‍ അഡ്വ. സലീം കോനാരി, സെക്രട്ടറി എം.മുസ്തഫ, ജോയിന്റ് സെക്രട്ടറി ജമാല്‍ മുഹമ്മദ്, പി.വി ഹസീബ് റഹ്മാന്‍ പങ്കെടുത്തു.