മാഡ്രിഡ്: റഫറിയെ പിടിച്ചു തള്ളിയതിന് അഞ്ചു മത്സരങ്ങളില്‍ ലഭിച്ച വിലക്കിനെതിരേ റയല്‍ മാഡ്രിഡ് സൂപ്പര്‍ താരം ക്രിസ്റ്റ്യാനോ റൊണാള്‍ഡോ നല്‍കിയ അപ്പീല്‍ തള്ളി. അപ്പീല്‍ സ്പാനിഷ് ഫുട്‌ബോള്‍ ഫെഡറേഷന്‍ പരിശോധിച്ചെങ്കിലും ക്രിസ്റ്റ്യാനോയുടെ നടപടി ഗൗരവസ്വഭാവത്തിലുള്ളതാണെന്ന് കമ്മിറ്റി വിലയിരുത്തി.
നേരത്തെ ബാഴ്‌സലോണയ്‌ക്കെതിരേ സ്പാനിഷ് സൂപ്പര്‍ കപ്പ് മത്സരത്തിന് മുന്‍പാണ് താരം അപ്പീല്‍ നല്‍കിയത്. എന്നാല്‍ അപ്പീല്‍ തള്ളിയതോടെ താരത്തിന് മത്സരം നഷ്ടമായി. ക്രിസ്റ്റ്യാനോയ്ക്ക് ലാ ലിഗയുടെ തുടക്കത്തിലെ നാലു മത്സരങ്ങളും ഇതോടെ നഷ്ടമാകും. ഡിപോര്‍ട്ടീവോ ലാ കൊരുണയ്‌ക്കെതിരേയാണ് റയലിന്റെ ആദ്യ മത്സരം. വലന്‍സിയ, ലെവാന്തെ, റയല്‍ സോസിഡാഡ് എന്നിവര്‍ക്കെതിരേയുമുള്ള മത്സരങ്ങളിലും ക്രിസ്റ്റ്യാനോയ്ക്ക് കളിക്കാനാവില്ല.
ബാഴ്‌സയ്‌ക്കെതിരേ രണ്ടാം മഞ്ഞക്കാര്‍ഡ് കണ്ടശേഷമായിരുന്നു ക്രിസ്റ്റ്യാനോ റഫറിയെ തള്ളിയത്. ഇതിന് നാലു മത്സരങ്ങളിലാണ് വിലക്ക് ലഭിക്കുക. ശേഷിച്ച ഒരു മത്സരം ചുവപ്പു കണ്ടതിലൂടെയാണ് നഷ്ടമായത്.