കൊച്ചി: നിയമപ്രകാരം ടാക്‌സും ഫീസും അടച്ച് സ്‌പെഷ്യല്‍ പെര്‍മിറ്റ് എടുക്കാതെ ഞായറാഴ്ചകളില്‍ വിവാഹ സര്‍വീസ് നടത്തുന്ന സ്വകാര്യ ബസുകള്‍ അടിയന്തിരമായി പിടിച്ചെടുത്ത് കര്‍ശന നടപടി സ്വീകരിക്കണമെന്ന് സംസ്ഥാന മനുഷ്യാവകാശ കമ്മിഷന്‍.
മോട്ടോര്‍ വെഹിക്കിള്‍ ഇന്‍സ്‌പെക്ടര്‍മാരുടെ നേതൃത്വത്തില്‍ അപകടകരമായ ഓവര്‍ടേക്കിങ് , മൊബൈല്‍ ഫോണ്‍ ഉപയോഗിച്ചുള്ള ഡ്രൈവിങ് എന്നിവ കണ്ടെത്തി ശിക്ഷാ നടപടികള്‍ സ്വീകരിക്കണമെന്നും കമ്മിഷന്‍ അധ്യക്ഷന്‍ പി.മോഹനദാസ് ഉത്തരവില്‍ പറഞ്ഞു.
ബസിനുള്ളിലെ ഇരിപ്പിടങ്ങളില്‍ സംവരണം അടിയന്തിരമായി ഉറപ്പാക്കണം, യാത്രക്കാരോട് ബസ് ജീവനക്കാര്‍ മാന്യമായി പെരുമാറണം, ഡ്രൈവറുടെ ക്യാബിന്‍ യാത്രക്കാരുമായി വേര്‍തിരിക്കണം, സമയവിവര പട്ടിക പ്രവദര്‍ശിപ്പിക്കണം, സ്പീഡ് ഗവര്‍ണര്‍ സ്ഥാപിക്കണം, ജീവനക്കാര്‍ യൂണിഫോം ധരിക്കുന്നുണ്ടെന്ന് ഉറപ്പുവരുത്തണം എന്നീ നിര്‍ദേശങ്ങളും കമ്മിഷന്‍ ഉത്തരവിലുണ്ട്.
ഗുരുതരമായ കുറ്റകൃത്യങ്ങള്‍ ചെയ്യുന്ന വാഹനങ്ങളിലെ ഡ്രൈവര്‍മാരുടെ ലൈസന്‍സ് പിടിച്ചെടുക്കണം. സംസ്ഥാനത്തെ മുഴുവന്‍ സിറ്റി സര്‍വീസുകളും വ്യവസ്ഥകള്‍ നിര്‍ബന്ധമായും പാലിക്കണമെന്നും കമ്മിഷന്‍ ആവശ്യപ്പെട്ടു. കൊച്ചി നഗരത്തില സ്വകാര്യസിറ്റി സര്‍വീസ് ബസുകള്‍ നടത്തുന്ന നിയമലംഘനങ്ങള്‍ക്കെതിരെ കമ്മിഷന്‍ സ്വമേധയാ രജിസ്റ്റര്‍ ചെയ്ത കേസിലാണ് ഉത്തരവ്.