കൊല്ലം: കേരളത്തെ രാജ്യത്തിലെ മികച്ച വ്യവസായ സൗഹൃദ സംസ്ഥാനമാക്കാനാണ് സര്‍ക്കാര്‍ ശ്രമിക്കുന്നതെന്ന് മുഖ്യമന്ത്രി പിണറായി വിജയന്‍ പറഞ്ഞു. കുണ്ടറ അലിന്‍ഡിന്റെ പുനഃപ്രവര്‍ത്തനം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
കേരളത്തില്‍ വ്യവസായം നടത്തുന്ന രാജ്യത്തെ പ്രമുഖ സംരംഭകര്‍ക്ക് ഇവിടുത്തെ സാഹചര്യങ്ങളെക്കുറിച്ച് പരാതികളില്ല. തൊഴിലാളി സംഘടനകളുടെ അമിതമായ ആവശ്യങ്ങള്‍ മൂലം ഏതെങ്കിലും വ്യവസായ സ്ഥാപനം പൂട്ടിപ്പോയതായി ആര്‍ക്കും ചൂണ്ടിക്കാട്ടാനാവില്ല. നാട്ടില്‍ വ്യവസായം ആരംഭിക്കാന്‍ വരുന്നവരെ നാടിനെ സഹായിക്കുന്നവരായി കണ്ട് അവര്‍ക്ക് അനുകൂലമായ സാഹചര്യം ഒരുക്കിനല്‍കുന്നതിന് സര്‍ക്കാര്‍ പ്രതിജ്ഞാബദ്ധമാണ്. വ്യവസായങ്ങള്‍ വന്നാല്‍ തൊഴിലവസരങ്ങള്‍ വര്‍ധിക്കും. കൂടുതല്‍ സംരംഭകരെ ആകര്‍ഷിക്കുന്നതിന് വ്യവസായ സൗഹൃദ അന്തരീക്ഷം സൃഷ്ടിക്കാനാണ് സര്‍ക്കാര്‍ ശ്രമിക്കുന്നതെന്നും അദ്ദേഹം പറഞ്ഞു.
അലിന്‍ഡിന്റെ നിക്ഷേപകര്‍ പ്രഖ്യാപിച്ചിട്ടുള്ള വികസന കാഴ്ച്ചപ്പാടിനുസൃതമായി മുന്നോട്ടുപോകുന്നതിന് സമ്പൂര്‍ണ പിന്തുണ നല്‍കും. കെ.എസ്.ഇ.ബി.യുമായി അലിന്‍ഡിന് മുന്‍പുണ്ടായിരുന്ന ഇടപാടുകള്‍ എങ്ങനെ പുനരാരംഭിക്കാനാകുമെന്ന് പരിശോധിക്കുമെന്നും അദ്ദേഹം പറഞ്ഞു.
ഭാവിയില്‍ അലിന്‍ഡില്‍ നിയമനങ്ങള്‍ നടത്തുമ്പോള്‍ മുന്‍പ് കമ്പനിയില്‍ ജോലി ചെയ്യുകയും കമ്പനി പൂട്ടിയതിനെത്തുടര്‍ന്ന് ദീര്‍ഘകാലം തൊഴിലില്ലാതെ വിരമിക്കുകയും ചെയ്തവരുടെ കുടുംബാംഗങ്ങള്‍ക്ക് പരിഗണന നല്‍കണമെന്ന് ചടങ്ങില്‍ അധ്യക്ഷത വഹിച്ച ഫിഷറീസ് മന്ത്രി ജെ. മേഴ്‌സിക്കുട്ടിയമ്മ പറഞ്ഞു.
സ്വിച്ച് ഓണ്‍ കര്‍മ്മം വ്യവസായ വകുപ്പ് മന്ത്രി എ സി മൊയ്തീനും പുതുക്കിപ്പണിത ഓഫീസിന്റെ ഉദ്ഘാടനം വൈദ്യുതി വകുപ്പ് മന്ത്രി എം.എം മണിയും നിര്‍വഹിച്ചു. പുനഃപ്രവര്‍ത്തനത്തിന്റെ സ്മാരകമായി വനംവകുപ്പ് മന്ത്രി കെ രാജു ചന്ദനത്തൈ നട്ടു.
എം.പിമാരായ എന്‍.കെ പ്രേമചന്ദ്രന്‍, കെ സോമപ്രസാദ്, ജില്ലാ പഞ്ചായത്ത് പ്രസിഡന്റ് കെ ജഗദമ്മ, ബ്ലോക്ക് പഞ്ചായത്ത് പ്രസിഡന്റ് സി സന്തോഷ്, മുന്‍ എം.പിമാരായ കെ.എന്‍. ബാലഗോപാല്‍, പി. രാജേന്ദ്രന്‍, ഗ്രാമപഞ്ചായത്ത് പ്രസിഡന്റ് കെ ബാബുരാജന്‍, ജില്ലാ പഞ്ചായത്തംഗങ്ങളായ ജൂലിയറ്റ് നെല്‍സണ്‍, ഡോ. കെ രാജശേഖരന്‍, സഹകരണ ജീവനക്കാരുടെ ക്ഷേമനിധി ബോര്‍ഡ് വൈസ് ചെയര്‍മാന്‍ കെ. രാജഗോപാല്‍, എസ് എല്‍ സജികുമാര്‍ തുടങ്ങിയവര്‍ സന്നിഹിതരായി.