മക്ക: കേരളത്തില്‍ നിന്നും ഹജ്ജിനെത്തിയ ഹാജിമാരുടെ ആദ്യ ജുമുഅ നിര്‍വ്വഹിച്ചു. ഹജ്ജ് സര്‍വ്വീസ് മുഖേന ഇത് വരെ മക്കയിലെത്തിയ അയ്യായിരത്തോളം ഹാജിമാര്‍ ആദ്യ ജുമുഅയില്‍ പങ്കെടുത്തു. ഇതിനകം ഏകദേശം പത്തു ലക്ഷത്തിലധികം തീര്‍ത്ഥാടകരാണ് മക്കയില്‍ എത്തിച്ചേര്‍ന്നിരിക്കുന്നത്.

മലയാളികളടക്കമുള്ള ഹാജിമാരുടെ മുഖത്തു വിശുദ്ധ ഹറമിലെ ആദ്യ ജുമുഅയില്‍ പങ്കെടുത്ത സന്തോഷം പ്രകടമായിരുന്നു. ഹറം പള്ളിയുടെ മുന്‍ഭാഗത്തും, ഉള്‍ഭാഗത്തും ഇടം പിടിക്കാന്‍ ഇന്ത്യന്‍ ഹാജിമാര്‍ നേരത്തെ തന്നെ പള്ളിയിലേക്ക് പുറപ്പെട്ടിരുന്നു. ഇവരുടെ താമസ സ്ഥലത്തു നിന്നും ഹറം പള്ളിയിലേക്ക് 24 മണിക്കൂറും സദാ സമയവും ബസ് സൗകര്യം ഏര്‍പ്പെടുത്തിയതിനാല്‍ അതി രാവിലെ മുതല്‍ തന്നെ പള്ളിയിലേക്ക് യാത്ര പോകാന്‍ വലിയൊരു അനുഗ്രഹമായി.

മക്കയില്‍ ശക്തമായ ചൂട് അനുഭവപ്പെടുന്നതിനാല്‍ ഹാജിമാര്‍ക്ക് മുന്‍കരുതല്‍ നിര്‍ദേശവുമായി അധികൃതര്‍ രംഗത്തുണ്ട്. വെള്ളിയാഴ്ച്ച 42 ഡിഗ്രിയില്‍ അധികമാണ് മക്കയിലെ ചൂട്. വരും ദിവസങ്ങളില്‍ ഇത് ക്രമാതീതമായി ഉയരുമെന്നും നിര്‍ജ്ജലീകരണം ഉള്‍പ്പെടെയുള്ള രോഗങ്ങള്‍ ശ്രദ്ധിക്കണമെന്നും അധികൃതര്‍ മുന്നറിയിപ്പ് നല്‍കുന്നുണ്ട്.

കൂടാതെ ഇവര്‍ക്ക് ഏറ്റവും അനുഗ്രഹമായി മാറുന്നത് മലയാളി സന്നദ്ധ സേവക സംഘങ്ങളുടെ ഇടപെടലുകളാണ്. ഹറമിലേക്കും തിരിച്ചും പ്രായമായവരെയും മുതിര്‍ന്നവരെയും എത്തിക്കുന്നതിലും സഹായം ചെയ്യുന്നതിലും സന്നദ്ധ സേവകര്‍ പ്രത്യേകം ശ്രദ്ധ കൊടുക്കുന്നത് ഏറെ സഹായകരമാവുന്നുണ്ട്.

ഇന്ത്യയില്‍ നിന്നും ഇതിനകം 95.000 ഓളം തീര്‍ത്ഥാടകര്‍ പുണ്യ ഭൂമിയില്‍ എത്തിച്ചേര്‍ന്നിട്ടുണ്ട്. ഇന്ത്യന്‍ തീര്‍ത്ഥാടകരെല്ലാവരും ഇപ്പോള്‍ മക്കയിലാണ്. നേരത്തെ മദീനയിലെത്തിയ തീര്‍ത്ഥാടകരെല്ലാം ഇതിനകം തന്നെ മക്കയില്‍ എത്തിച്ചേര്‍ന്നിട്ടുണ്ട്.