ലഖ്‌നൗ: ബി.ആര്‍.ഡി മെഡിക്കല്‍ കോളജ് ദുരന്തത്തില്‍ മരിച്ച കുട്ടികളുടെ കുടുംബങ്ങളെ കാണാനെത്തിയ കോണ്‍ഗ്രസ് ഉപാധ്യക്ഷന്‍ രാഹുല്‍ഗാന്ധിക്കെതിരേ ആഞ്ഞടിച്ച് യു.പി മുഖ്യമന്ത്രി യോഗി ആദിത്യനാഥ്. ഗൊരഖ്പൂരിനെ വിനോദസഞ്ചാര കേന്ദ്രമാക്കാന്‍ രാഹുല്‍ഗാന്ധിയെ അനുവദിക്കില്ലെന്നും സന്ദര്‍ശനത്തിനെത്തിയാല്‍ തടയുമെന്നും യോഗി പറഞ്ഞു.
ഗൊരഖ്പൂരില്‍ 'സ്വച്ഛ് ഉത്തര്‍പ്രദേശ് സ്വസ്ത് ഉത്തര്‍പ്രദേശ് ' കാംപയില്‍ ഉദ്ഘാടനം ചെയ്യാനെത്തിയതായിരുന്നു അദ്ദേഹം. ഡല്‍ഹിയിലുള്ള രാജകുമാരന് വിശുദ്ധിയുടെ അര്‍ഥമെന്തെന്ന് അറിയില്ല. അദ്ദേഹത്തെ സംബന്ധിച്ച് ഗൊരഖ്പൂര്‍ ഒരു വിനോദ സഞ്ചാരകേന്ദ്രമാണ്. അത് അനുവദിക്കില്ലെന്നും ആദിത്യനാഥ് പറഞ്ഞു.
കഴിഞ്ഞ പതിനഞ്ചു വര്‍ഷമായി എസ്.പിയും ബി.എസ്.പിയും യു.പിയെ ഒന്നുമല്ലാതാക്കിയിരിക്കുകയാണ്. സ്വന്തം കീശ നിറയ്ക്കാനായി അവര്‍ ജനങ്ങള്‍ക്കു ലഭ്യമാക്കേണ്ട സൗകര്യങ്ങള്‍ നിഷേധിച്ചു. മസ്തിഷ്‌കജ്വരത്തിന് എതിരായ നടപടികളാണ് ഇനിയുണ്ടാവുക. അസുഖം വന്നതിനുശേഷം പ്രതിരോധിക്കുന്നതിനെക്കാള്‍ വരാതിരിക്കാനുള്ള മുന്‍കരുതലാണു വേണ്ടതെന്നും യോഗി ആദിത്യനാഥ് പറഞ്ഞു.