ദാംബുല്ല: ടെസ്റ്റ് പരമ്പരയിലെ ഗംഭീര ജയങ്ങള്‍ ഏകദിനത്തിലും തുടരാന്‍ ഇന്ത്യ ഇന്നിറങ്ങും. ഇന്ത്യ-ശ്രീലങ്ക ഏകദിന പരമ്പരയിലെ ആദ്യ മത്സരം ഇന്ന് ദാംബുല്ലയില്‍ നടക്കും. അഞ്ചു മത്സരങ്ങളാണ് പരമ്പരയില്‍ ഉള്ളത്. പ്രമുഖ താരങ്ങള്‍ക്ക് വിശ്രമമനുവദിച്ചാണ് ഇന്ത്യ കളത്തിലിറങ്ങുന്നത്. ബൗളര്‍മാരില്‍ ഉമേഷ് യാദവ്, മുഹമ്മദ് ഷമി, രവീന്ദ്ര, ജഡേജ, രവിചന്ദ്രന്‍ അശ്വിന്‍ എന്നിവര്‍ക്ക് വിശ്രമമനുവദിച്ചാണ് ഇന്ത്യ മത്സരിക്കാനിറങ്ങുന്നത്.
അതേസമയം പുതിയ താരങ്ങള്‍ക്ക് കഴിവ് പ്രകടിപ്പിക്കാനുള്ള അവസരം കൂടിയാണിതെന്ന് ക്യാപ്റ്റന്‍ വിരാട് കോഹ്‌ലി കരുതുന്നു. ഇതേ പിച്ചില്‍ തന്നെയാണ് കോഹ്‌ലി തന്റെ ആദ്യ മത്സരം കളിച്ചതും. പ്രമുഖ താരങ്ങളെല്ലാം ഫോമിലാണെന്നത് ടീമിന് ഗുണകരമാണ്. ശ്രീലങ്കയെ സംബന്ധിച്ച് ഏറ്റവും നിര്‍ണായകമാണ് ഈ പരമ്പര. 2019ലെ ലോകകപ്പിന് യോഗ്യത നേടണമെങ്കില്‍ പരമ്പരയിലെ രണ്ടു മത്സരമെങ്കിലും ജയിച്ചിരിക്കണം. റാങ്കിങ് പട്ടികയില്‍ എട്ടാം സ്ഥാനത്താണ് ലങ്ക. അവര്‍ക്ക് 88 പോയിന്റാണുള്ളത്.
തൊട്ടുപിന്നിലുള്ള വെസ്റ്റിന്‍ഡീസിന് 78 പോയിന്റുണ്ട്. ഇംഗ്ലണ്ട്,അയര്‍ലന്‍ഡ് ടീമുകള്‍ക്കെതിരേ അവര്‍ക്ക് പരമ്പരയുണ്ട്. അതില്‍ ജയിച്ചാല്‍ വിന്‍ഡീസിന് സാധ്യതയേറും. എന്നാല്‍ ഇന്ത്യക്കെതിരേ രണ്ടു മത്സരങ്ങളില്‍ ജയിക്കാന്‍ സാധിച്ചാല്‍ ലങ്കയ്ക്ക് 90 പോയിന്റാവും. ഇതോടെ പോരായ്മ മറികടക്കാന്‍ അവര്‍ക്ക് സാധിക്കും. നിലവില്‍ ടീം വളരെ ദുര്‍ബലമായതിനാല്‍ ഗംഭീര പ്രകടനം കാഴ്ച്ചവച്ചാല്‍ മാത്രമേ ലങ്കയ്ക്ക് ജയിക്കാന്‍ സാധിക്കൂ.
സിംബാബ്‌വെക്കെതിരേ സ്വന്തം മണ്ണില്‍ പരമ്പര തോറ്റത് ലങ്കയെ സംബന്ധിച്ച് കനത്ത തിരിച്ചടിയായിരുന്നു. ആദ്യ മത്സരത്തിനിറങ്ങുമ്പോള്‍ ശ്രീലങ്കയെ വിലകുറച്ചു കാണാന്‍ ഇന്ത്യ തയാറല്ല. പക്ഷേ ടെസ്റ്റ് പരമ്പര 3-0ന് തൂത്തുവാരിയതിന്റെ ആത്മവിശ്വാസം ടീമിനുണ്ട്. മികച്ച ഫോമില്‍ കളിക്കുന്ന ശിഖര്‍ ധവാനിലാണ് ഇന്ത്യയുടെ പ്രതീക്ഷ. ഇന്നിങ്‌സ് ഓപണ്‍ ചെയ്യാന്‍ രോഹിത് ശര്‍മ കൂടിയെത്തുന്നതോടെ ഇന്ത്യയുടെ കരുത്ത് വര്‍ധിക്കും.
ലോകേഷ് രാഹുല്‍, മനീഷ് പാണ്ഡെ, അജിന്‍ക്യ രഹാനെ എന്നിവരടങ്ങുന്ന മധ്യനിരയും കരുത്തുറ്റതാണ്. മുന്‍ നായകന്‍ മഹേന്ദ്ര സിങ് ധോണി ദാംബുല്ലയില്‍ കളിക്കുന്ന ആദ്യ മത്സരമാണിത്. ബൗളിങില്‍ ഭുവനേശ്വര്‍ കുമാറിന്റെയും ജസ്പ്രിത് ബുമ്‌റയുടെയും പന്തുകള്‍ ലങ്കയ്ക്ക് വെല്ലുവിളിയാകും. യുസ്‌വേന്ദ്ര ചഹലിന് കഴിവ് പ്രകടിപ്പിക്കാനുള്ള വേദി കൂടിയാണിത്. ടീമിലെ പ്രധാന സ്പിന്നറായി അക്ഷര്‍ പട്ടേല്‍ രംഗത്തുള്ളപ്പോള്‍ കുല്‍ദീപ് യാദവും ചഹലും തമ്മിലായിരിക്കും പ്രകടനത്തിന്റെ കാര്യത്തില്‍ മത്സരം. പേസര്‍മാരില്‍ ഷാര്‍ദുല്‍ താക്കൂറിനും മികവ് പ്രകടിപ്പിക്കാനുള്ള അവസരമാണിത്.
എന്നാല്‍ ലങ്കന്‍ നിര സ്ഥിരതയില്ലാത്തവരുടെ സംഘമാണ്. നായകന്‍ ഉപുല്‍ തരംഗ ടീമിനെ മുന്നില്‍ നിന്ന് നയിക്കേണ്ടത് അത്യാവശ്യമാണ്. നിരോഷന്‍ ഡിക്‌വെല, ധനുഷ്‌ക ഗുണതിലക, കുശാല്‍ മെന്‍ഡിസ്, ചമര കപുഗദേര, എയ്ഞ്ചലോ മാത്യൂസ് തുടങ്ങിയ മികവുറ്റ താരങ്ങളും ടീമിലുണ്ട്. എന്നാല്‍ പരിചയസമ്പത്തില്ലാത്ത ബൗളിങ് നിര അവരുടെ ദൗര്‍ബല്യമാണ്. ലസിത് മലിംഗയാണ് പരിചയസമ്പത്തുള്ള ഏക താരം. ലക്ഷന്‍ സന്ദാകന്‍, ചമീര, വിശ്വ ഫെര്‍ണാണ്ടോ എന്നിവര്‍ മികവലേക്കുയര്‍ന്നാല്‍ ലങ്കയ്ക്ക് ഇന്ത്യയെ ഞെട്ടിക്കാനാവും.