കോഴിക്കോട്: നഗരത്തില്‍ സ്ത്രീസുരക്ഷയുടെ കാവലായ പിങ്ക് പൊലിസിന് സേവനപാതയില്‍ ഒരു പൊന്‍തൂവല്‍ കൂടി. കഴിഞ്ഞ ദിവസം പണവും പഴ്‌സും മൊബൈലും നഷ്ടപ്പെട്ട കുണ്ടുപറമ്പ് സ്വദേശിക്കാണ് പിങ്ക് പൊലിസ് വഴികാട്ടിയായത്.
മകളുടെ വീട്ടിലേക്കുള്ള യാത്രയ്ക്കിടെ ഇവരുടെ പണവും പഴ്‌സും മൊബൈലും നഷ്ടപ്പെടുകയായിരുന്നു. പരാതി നല്‍കാന്‍ കണ്‍ട്രോള്‍ റൂമിലെത്തിയപ്പോഴാണ് പിങ്ക് പൊലിസ് ഇവര്‍ക്ക് തുണയായത്. പരാതി സ്വീകരിക്കുകയും ഇവര്‍ക്കു വീട്ടിലേക്ക് പോകാന്‍ പണം നല്‍കുകയും ചെയ്തു.
തുടര്‍ന്ന് ഇവരുടെ ഫോണില്‍ പിങ്ക് പൊലിസ് ബന്ധപ്പെടാന്‍ ശ്രമിച്ചപ്പോള്‍ റിങ് ചെയ്യുന്നതായി ശ്രദ്ധയില്‍പ്പെടുകയായിരുന്നു.
ആദ്യം ഹിന്ദി സംസാരിക്കുന്ന ഒരു വ്യക്തിയായിരുന്നു ഫോണ്‍ എടുത്തത്. പിന്നീട് പല തവണ വിളിച്ചിട്ടും ആരും ഫോണ്‍ എടുത്തില്ല. അവസാന ശ്രമത്തിനിടെയാണ് കെ.ടി.സിയുടെ സമീപത്തുള്ള ഒരു കടയില്‍ നഷ്ടപ്പെട്ട ഫോണുണ്ടെന്ന് വിവരമറിഞ്ഞത്.
ഉടനെ പൊലിസ് ഇവരെയും കൂട്ടി കടയിലെത്തുകയായിരുന്നു. കടയുടമയില്‍നിന്ന് ഫോണും പഴ്‌സും തിരിച്ചു ലഭിക്കുകയും ചെയ്തു. പണമൊന്നും നഷ്ടപ്പെട്ടിരുന്നില്ല. നഷ്ടപ്പെട്ടതെല്ലാം തിരിച്ചു ലഭിച്ച സന്തോഷത്തില്‍ പിങ്ക് പൊലിസിനോട് നന്ദി പറഞ്ഞായിരുന്നു ഇവരുടെ മടക്കം.
വീട്ടിലേക്കു പോകാന്‍ മാനാഞ്ചിറയിലെ ബസ്‌ബേയില്‍ ഇവരെ പൊലിസ് ഇറക്കിക്കൊടുക്കുകയും ചെയ്തു. ഇതുപോലെ നിരവധി പേര്‍ക്ക് പിന്തുണയുമായി പിങ്ക് പൊലിസ് നഗരത്തിലുണ്ട്.
എ.എസ്.ഐ സുഗുണ, സിവില്‍ പൊലിസ് ഓഫിസര്‍മാരായ ഷീബ, ജിനി, ജുസൈറ എന്നിവരടങ്ങിയ സംഘമാണ് നേതൃത്വം നല്‍കുന്നത്.