കണ്ണൂര്‍: നോര്‍ക്ക റൂട്ട്‌സ് മുഖേന സംസ്ഥാന സര്‍ക്കാര്‍ നടപ്പാക്കുന്ന പ്രവാസി പുനരധിവാസ പദ്ധതി പരിഷ്‌കരണം സംബന്ധിച്ച് 31ന് നടക്കുന്ന കണ്‍വന്‍ഷന്റെ ഭാഗമായി കണ്ണൂര്‍, കാസര്‍കോട് ജില്ലകളിലെ പ്രവാസികളുടെ യോഗം കണ്ണൂര്‍ കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്നു. കേരള പ്രവാസി സംഘം സംസ്ഥാന വൈസ് പ്രസിഡന്റ അബ്ദുല്ല അധ്യക്ഷനായി. ബാദുഷ കടലുണ്ടി, പ്രശാന്ത്, വിജു സംസാരിച്ചു.
രണ്ട് വര്‍ഷത്തിലധികം വിദേശത്ത് ജോലി ചെയ്ത് നാട്ടില്‍ തിരിച്ചെത്തിയ പ്രവാസികളുടെ പുനരധിവാസം ലക്ഷ്യമാക്കി സംസ്ഥാന സര്‍ക്കാര്‍ ആവിഷ്‌കരിച്ച പദ്ധതിയില്‍ 20 ലക്ഷം രൂപ വരെയുള്ള ബാങ്ക് വായ്പകള്‍ക്ക് നോര്‍ക്ക റൂട്ട്‌സ് 15% മൂലധന സബ്‌സിഡിയും മുടക്കം കൂടാതെ തിരിച്ചടക്കുന്നവര്‍ക്ക് ആദ്യത്തെ നാല് വര്‍ഷത്തേക്ക് പലിശ സബ്‌സിഡിയും അനുവദിക്കുന്നുണ്ട്.
സഹകരണ ബാങ്കുകളെയും മറ്റ് ബാങ്കുകളെയും പദ്ധതിയില്‍ ഉള്‍പ്പെടുത്തുവാനും വിവിധ സംഘടനകളുടെ നേതൃത്വത്തില്‍ ശക്തമായി പ്രചാരണപരിപാടികള്‍ നടത്തി 31ന് കോഴിക്കോട്ട് വച്ച് നടക്കുന്ന കണ്‍വന്‍ഷന്‍ വിജയിപ്പിക്കാന്‍ യോഗം തീരുമാനിച്ചു.