നെടുമങ്ങാട്: മൈലം ജി.വി.രാജ സ്‌പോര്‍ട്‌സ് സ്‌കൂളില്‍  ശബരീനാഥന്‍ എം.എല്‍.എ മിന്നല്‍ സന്ദര്‍ശനം നടത്തി.
ഇന്നലെ രാത്രി 7 മണിയോടെയാണ് എം.എല്‍.എ സ്‌കൂളിലെത്തിയത്. സ്‌കൂളിലുണ്ടായ ഭക്ഷ്യവിഷബാധയെ തുടര്‍ന്ന്  ഒരാഴ്ചയോളം അടച്ചിട്ട സ്‌കൂള്‍ രണ്ട് ദിവസം മുന്‍പാണ് തുറന്നത്. പഴയ കരാറുകാരനെ ഒഴിവാക്കി പുതിയൊരാളെ ഭക്ഷണത്തിന്റെ ചുമതല നല്‍കിയിരുന്നു. ഈ സാഹചര്യത്തിലാണ് എം.എല്‍.എ  സന്ദര്‍ശനത്തിനെത്തിയത്.
എം.എല്‍.എ എത്തിയ സമയം കുട്ടികള്‍ ഭക്ഷണം കഴിക്കുന്ന തിരക്കിലായിരുന്നു. തുടര്‍ന്ന് എം.എല്‍.എയും അവര്‍ക്കൊപ്പമിരുന്ന് ഭക്ഷണം കഴിച്ചു. ഭക്ഷണത്തിന്റെ പേരില്‍ ഇനി പ്രശ്‌നങ്ങളുണ്ടാകാതിരിക്കാനും ഗുണമേന്മയുള്ള ഭക്ഷണം കൊടുക്കാനും ഉത്തരവാദിത്തപ്പെട്ടവര്‍ കൂടുതല്‍ ശ്രദ്ധിക്കണമെന്ന് എം.എല്‍.എ നിര്‍ദ്ദേശം നല്‍കി.
സ്‌കൂള്‍ പ്രിന്‍സിപ്പാള്‍ ഡോ.സി.എസ്.പ്രദീപ്, അധ്യാപകര്‍, മറ്റ് ജീവനക്കാര്‍ എന്നിവരും എം.എല്‍.എക്കൊപ്പം ചേര്‍ന്നു.