പ്രിട്ടോറിയ: ഇന്ത്യ-ദക്ഷിണാഫ്രിക്ക എ ടീമുകളുടെ ടെസ്റ്റ് പരമ്പരയിലെ രണ്ടാം മത്സരത്തില്‍ ഇന്ത്യക്ക് ആറു വിക്കറ്റിന്റെ തകര്‍പ്പന്‍ ജയം. 223 റണ്‍സിന്റെ വിജയലക്ഷ്യവുമായി ഇറങ്ങിയ ഇന്ത്യ നാലു വിക്കറ്റ് നഷ്ടത്തില്‍ അനായാസം ലക്ഷ്യം കാണുകയായിരുന്നു. ജയത്തോടെ രണ്ടുമത്സരങ്ങളുടെ പരമ്പര 1-1ന് സമനിലയിലായി.
ആദ്യ ഇന്നിങ്‌സില്‍ ലീഡ് വഴങ്ങിയെങ്കിലും ദക്ഷിണാഫ്രിക്കയെ രണ്ടാമിന്നിങ്‌സില്‍ 177 റണ്‍സിന് പുറത്താക്കിയാണ് ഇന്ത്യ മത്സരത്തിലേക്ക് തിരിച്ചെത്തിയത്. സ്റ്റീഫന്‍ കുക്ക്(70*) ഒരറ്റത്ത് നിന്ന് പൊരുതിയെങ്കിലും മറ്റാര്‍ക്കും വേണ്ടത്ര മികവിലേക്കുയരാനായില്ല. മക്രാം(19) ഡേവിഡ് മില്ലര്‍(18) ഫെലുക്‌വായോ(29) എന്നിവര്‍ക്കൊന്നും മികച്ച തുടക്കം മുതലാക്കാനായില്ല. 10 ബൗണ്ടറിയടങ്ങുന്നതാണ് കുക്കിന്റെ ഇന്നിങ്‌സ്. മൂന്നുവിക്കറ്റ് വീതം വീഴ്ത്തിയ ഷഹബാസ് നദീം, അങ്കിത് രജ്പൂത്, എന്നിവര്‍ ബൗളിങില്‍ തിളങ്ങി.
മറുപടി ബാറ്റിങില്‍ രവികുമാര്‍ സമര്‍ഥ്(55) സുദീപ് ചാറ്റര്‍ജി(18) സഖ്യം ശ്രദ്ധയോടെയാണ് തുടങ്ങിയത്. 90 പന്തില്‍ ആറു ബൗണ്ടറിയടങ്ങുന്നതാണ് സമര്‍ഥിന്റെ ഇന്നിങ്‌സ്. ചാറ്റര്‍ജി പുറത്തായ ശേഷം ക്രീസിലെത്തിയ ശ്രേയസ് അയ്യര്‍(15) പെട്ടെന്ന് മടങ്ങിയെങ്കിലും മലയാളി താരവും ക്യാപ്റ്റനുമായ കരുണ്‍ നായര്‍(90) തകര്‍പ്പന്‍ ഇന്നിങ്‌സുമായി ടീമിനെ ജയത്തിലേക്ക് നയിച്ചു. 144 പന്തില്‍ 13 ബൗണ്ടറിയടങ്ങുന്നതാണ് കരുണിന്റെ ഇന്നിങ്‌സ്. അങ്കിത് ഭാവ്‌ന(32*) ഹനുമ വിഹാരി(4*) എന്നിവര്‍ പുറത്താകാതെ നിന്നു.